Өнгөрсөн онд 44869 суудлын автомашин нэмэгджээ
Монгол Улсын хилээр нэвтэрч буй бараа, бүтээгдэхүүн, тээврийн хэрэгсэлд хяналт бүрдүүлэлт хийн, хуульд заасан хувь хэмжээгээр гаалийн болон бусад татварыг ногдуулан хурааж, улсын төсөвт төвлөрүүлэх ажлыг гаалийн байгууллага гүйцэтгэдэг билээ.
Мэдээллийн алба
Манай улсын гаалийн байгууллагаас гаргасан тоо баримтаар өнгөрсөн онд нийт 1,6 их наяд төгрөгийн гаалийн болон бусад татварын орлогыг улсын төсөвт төвлөрүүлсэн бөгөөд үүнээс импортоор орж ирсэн 44869 ширхэг суудлын автомашинд гаалийн бүрдүүлэлт хийж, 202.3 тэрбум төгрөгийн татварын орлогыг улсын төсөвт оруулсан нь нийт орлогын 12,6 хувь болжээ.
Үүнээс суудлын автомашины импортын гаалийн албан татвар 28,2 тэрбум төгрөг, нэмэгдсэн өртгийн албан татвар 69,7 тэрбум төгрөг, онцгой албан татвар 104,4 тэрбум төгрөг нийлээд 202,3 тэрбум төгрөгийн орлого бүрдсэн байна.
