З.Энхболд Пусан дахь монгол иргэдтэй уулзлаа
Нэг үхрийн эвэр доргивол мянган үхрийн эвэр доргидог. Тиймээс БНСУ-д сууж байгаа монгол иргэд хууль дүрмийг сайтар сахин биелүүлж амьдрах хэрэгтэйг санууллаа. Ингээд хөдөлмөрч, бүтээлч монголчууд эх орондоо ирж, үйлдвэр байгуулж, экспортыг дэмжиж, импортыг орлох бүтээгдэхүүнийг дэмжих зорилгоор эх о
Мэдээллийн алба
УИХ-ын дарга З.Энхболд айлчлалынхаа хоёр дахь өдөр буюу энэ сарын 14-нд БНСУ-ын Пусан хотод зочилж, манай улсаас тус хотод ажиллаж амьдардаг 6000 гаруй иргэний төлөөлөлтэй уулзалт хийв.
БНСУ-д нийт 26 мянга орчим монгол хүн ажиллаж, амьдарч байна. Харин 7785 орчим манай улсын иргэн хууль бусаар ажиллаж байна гэсэн статистик дүн байна. Жил ирэх бүр хууль бусаар ажиллаж амьдарч байгаа иргэдийн тоо буурч байгаа аж. УИХ-ын дарга уулзалтынхаа эхэнд хэлэхдээ, Солонгос улс бол бүс нутаг дахь Монгол Улсын ойрын түнш орны нэг. Солонгос дахь монгол иргэдийн эрх ашгийг хамгаалахаар энд Хөдөлмөрийн яам болон Хүн амын хөгжил, нийгмийн хамгааллын яам үйл ажиллагаа явуулж байгаа. Монгол дахь БНСУ-ын Элчин сайдын яамны зүгээс монгол иргэдэд виз өгөхийн тулд 7-14 сая төгрөгийн барьцаа хөрөнгө шаарддаг. Энэ асуудлыг айлчлалын хүрээнд хөндөж БНСУ-ын төр, засгийн удирдлагуудтай хэлэлцсэн гэлээ. Мөн БНСУ дахь монголчууд гэмт хэрэг үйлдэх тохиолдлууд гарч байгаа. Нэг үхрийн эвэр доргивол мянган үхрийн эвэр доргидог. Тиймээс БНСУ-д сууж байгаа монгол иргэд хууль дүрмийг сайтар сахин биелүүлж амьдрах хэрэгтэйг санууллаа. Ингээд хөдөлмөрч, бүтээлч монголчууд эх орондоо ирж, үйлдвэр байгуулж, экспортыг дэмжиж, импортыг орлох бүтээгдэхүүнийг дэмжих зорилгоор эх орондоо ирж бүтээн байгуулалт хийхийг уриалав. Эх орондоо бүтээн байгуулалт хийх, үйлдвэр байгуулах иргэдийн тоног төхөөрөмжийг татвараас чөлөөлөх зэрэг бодлогыг хууль тогтоох дээд байгууллагаас шийдвэрлэх зорилготой байгаагаа хэллээ.
Уулзалтад Хүн амын хөгжил, нийгмийн хамгааллын сайд С.Эрдэнэ оролцож “Шинэчлэлийн Засгийн газар хүн амын хөгжлийн стратеги бодлогыг голлон анхаарч байна. Өмнө нь хүн амыг дөрвөн бүлэгт хуваадаг байсан бол одоо хөгжлийн бэрхшээлтэй иргэдийг нэмж таван бүлэг болгосон. Хүний хөгжил, хамгааллын чиглэлээр олон төсөл, арга хэмжээ хэрэгжүүлж байна. Жендэрийн асуудал, хүн амын хөгжлийн стратегийн асуудлыг боловсруулж, батлуулах шатандаа байгаа. Мөн БНСУ-д ажиллаж байгаа иргэд тэтгэврийн даатгалын шимтгэл төлөх боломжийг бүрдүүлсэн. Гадаад орнуудад 150 мянга орчим монгол хүн амьдарч байна. Мөн гадаадын иргэнтэй гэр бүл болсон тэднээс гарсан хүүхдийн иргэншил, харьяаллын асуудал сүүлийн үед ихээр хөндөгдөх болсон нь эрх зүйн орчныг боловсронгуй болгох шаардлага юм. Энэ чиглэлээр нийгмийн хамгааллын үйлчилгээний төв бодлого боловсруулж эхэлсэн бөгөөд Солонгосын холбогдох байгууллагуудтай хамтран ажиллах болсноо мэдэгдлээ. Солонгост ажиллаж байгаа монголчууд зөвхөн байр авах мөнгөтэй болоод нутаг буцах бус, харин мөнгөөр хэмжишгүй үнэт капитал, "know-how" ололтуудыг эх орондоо нэвтрүүлэх, сурсан мэдлэгээ хэрэгжүүлэх хэрэгтэйг уриаллаа.
ХаринУИХ-ын гишүүн, Хөдөлмөрийн сайд Я.Санжмятав “УИХ-ын даргын БНСУ-д хийж байгаа айлчлалын хүрээнд Пусан хот руу шууд нислэгтэй болох асуудлыг хэлэлцэж байна. Мөн Солонгост ажиллаж амьдарч байгаа монгол иргэдийн гэр бүлийнхэнд тулгарч байгаа визийн болон бусад асуудлыг шийдэж өгөх санал дэвшүүлсэн нь чухал болохыг уламжлав. Түүнчлэн жижиг, дунд үйлдвэрлэлийг дэмжих бодлогын хүрээнд Солонгост хөдөлмөр эрхэлж буй иргэдийг эх орондоо бүтээн байгуулалт хийх хэрэгтэйг хэлэв. Энэхүү уулзалтын үеэр Пусан хотод ажиллаж, суралцаж байгаа монголчууд сонирхсон асуултаа асуусан юм. Иргэдийн хувьд визийн асуудал, Пусан хотод нээхээр төлөвлөж буй Консулын газрын талаар олон асуулт тавьжээ.
