Зүүн ба Зүүн Өмнөд Ази дахь ЮНЕСКО-ийн үндэсний комиссуудын төслийн уулзалт боллоо

ЮНЕСКО-ийн Солонгосын үндэсний комиссын хэрэгжүүлж буй Зүүн ба Зүүн Өмнөд Ази дахь ЮНЕСКО-ийн Үндэсний комиссуудын хамтарсан төслийн явцын уулзалт өчигдөр онлайнаар явагдлаа.

ЮНЕСКО-ийн Солонгосын үндэсний комисс нь “Тогтвортой хөгжил-2030 хөтөлбөрийн Ази, Номхон далайн бүс нутаг дахь хэрэгжилтийг хангахад бүс нутгийн хамтын ажиллагаа урьд өмнөхөөсөө илүү чухал болоод байна” хэмээн 2018 оны ЮНЕСКО-ийн Үндэсний комиссуудын Ази, Номхон далайн бүс нутгийн уулзалтаар батлагдсан Гёнжугийн зөвлөмжид тусгагдсаны дагуу Зүүн ба Зүүн өмнөд Ази дахь ЮНЕСКО-ийн Үндэсний комиссуудын хамтарсан төслийг санаачлан өнгөрсөн сараас эхлэн хэрэгжүүлж байгаа билээ.

Уг төсөл нь хоёр жилийн хугацаанд хэрэгжих бөгөөд дэд бүс нутаг дахь ЮНЕСКО-ийн Үндэсний комиссуудын түүх, өнөөгийн үйл ажиллагаа болон ирээдүйн зорилтуудад дүн шинжилгээ хийж Үндэсний комисс тус бүрийн онцлог шинж, оролцогч талуудын нийтлэг үнэт зүйлсийг тодорхойлох замаар ЮНЕСКО-ийн энх тайван, эв нэгдлийг бий болгох зорилтыг хэрэгжүүлэх чиглэлд харилцан ойлголцол, хамтын ажиллагааг нэмэгдүүлэх зорилготой.

Уг уулзалтаар оролцогч талууд төслийн хэрэгжилтийн явц, тулгарч буй саад бэрхшээл болон цаашдын санал хүсэлтээ солилцсон бөгөөд ЮНЕСКО-ийн Монголын үндэсний комиссыг төлөөлж тус комиссын Нийгэм, хүмүүнлэгийн шинжлэх ухааны асуудал хариуцсан мэргэжилтэн Г.Намуун, судлаач Д.Начин нар оролцлоо.