Америкийн коллежийн сагсан бөмбөгийн аварга баг тодорлоо

NCAA буюу Америкийн коллежийн сагсан бөмбөгийн аварга шалгаруулах тэмцээний аваргын төлөөх тоглолт өнөөдөр болсон. Аваргын төлөө "Duke" болон "Wisconsin"-ийн их сургуулийн багууд тунаж үлдээд байсан юм.

Хоёр багийн тоглолт Индианаполис хотын "Lucas Oil Stadiоn"-д болсон байна. АНУ-ын шигшээ багийн алдарт дасгалжуулагч Майк Кржижевскигээр удирдуулсан "Duke" багийн хувьд хагас шигшээ тоглолтод "Michigan State"-ийн багийг 81:61 харьцаагаар илт давуу хожин аваргын төлөө шалгарсан бол 14 дэх жилдээ дасгалжуулж байгаа Бо Ряанаар удирдуулсан "Wisconsin"-ийн их сургуулийн баг шилдэгт тооцогдож байсан "Kentucky" багийг 71:64-өөр буулган авч 1941 оноос хойш анх удаа аваргын төлөө тоглохоор шалгарсан аж.

Тоглолтын цаг дуусахад "Duke"-ийн их сургуулийн баг 68:63-ын харьцаагаар ялалт байгуулж 2014-2015 оны NCAA буюу Америкийн коллежийн сагсан бөмбөгийн аварга шалгаруулах тэмцээний аварга багаар тодорсон байна. Ингэснээр тэд аваргын цомыг тав дахь удаагаа өргөж байгаа юм.