“Asashoryu Cup-2015” ирэх амралтын өдрүүдэд болно

Чөлөөт бөхийн өсвөрийн “Asashoryu Cup-2015” олон улсын анхдугаар тэмцээн ирэх амралтын өдрүүдэд “Буянт-Ухаа” спортын ордонд болох гэж байна.

Тэмцээнд БНСУ, БНХАУ-ын Өвөрмонголын өөртөө засах орны Хөх хот, Шилийн гол аймаг, Казахстан, Киргиз, Монгол, ОХУ-ын Буриад, Тува зэрэг орны өсвөрийн чөлөөт бөхийн шигшээ баг, бөхчүүд барилдахаар мэдүүлгээ өгчээ.

Дэлхийн бөхийн нэгдсэн холбооноос тус тэмцээнд техникийн төлөөлөгчөөр Эстон улсын иргэн, олон улсын шүүгч Аапонг Пээпийг томилсон байна.

Дашрамд дуулгахад, ирэх оны дөрөвдүгээр сарын 22-24-ний өдрүүдэд Монгол Улсад “Рио-де-Жанейро-2016” олимпийн наадмын эрх олгох тэмцээн болно.

Энэ тэмцээнээс сонгомол барилдаан, эрэгтэй чөлөөт бөхийн төрөлд жин тус бүрт 3 эрх, эмэгтэй чөлөөт бөхийн төрөлд жин тус бүрт 2 эрх олгох аж.