“August” баг урд хөршид болох тэмцээнд өрсөлдөнө

Цахим спортын “ZOWIE eXTREMESLAND 2019” Asia final тэмцээн ирэх сарын 14-17-нд урд хөршийн Шанхай хотод болно. Тус тэмцээнд Монгол Улсыг төлөөлж оролцох багийг сонгох шалгаруулалт өнгөрсөн долоо хоногт болжээ. Эл шалгаруулалтын шөвгийн дөрөвт “August”, “Мазаалай”, “D13”, “2990” баг үлдсэнээс “August” аваргалж, “Мазаалай” аман хүзүүджээ.

Ташрамд дуулгахад, Монголын шилдэг тамирчдыг эгнээндээ нэгтгэсэн электрон спортын “August” нэртэй баг байгуулагдсан талаар бид өмнө нь мэдээлсэн. Тус багийн албан ёсны бүрэлдэхүүнд "erkaSt" Г.Эрдэнэцогт болон “Kabal”, "dobu", “Zilkenberg” “NEUZ” нэрээр тоглодог тоглогч багтсан юм. Түүнчлэн багийн гишүүд хилийн чанадад гадны багт мэргэжлийн тоглогчийн гэрээгээр тоглож байсан туршлагатай тамирчин бөгөөд бүгд олон улсын тэмцээнд амжилттай оролцож байжээ.