Бастиан Швайнштайгер АНУ-д тоглохоор боллоо

Германы шигшээ багийн ахлагч асан Бастиан Швайнштайгер Английн "Манчестер Юнайтед" клубыг орхихоор болсон байна. Швайнштайгер урд шөнө АНУ-ын "Чикаго Файер" багтай албан ёсоор гэрээнд гарын үсэг зурж, багаа орхихоор болсоноо албан ёсоор мэдэгджээ.

Бастиан Швайнштайгер Германы алдарт “Байерн Мюнхен” багт 13 жилийн турш хүчин зүтгэснийхээ дараа 2015 оны 7-р сард Английн алдарт “Манчестер Юнайтед”-ад 14.4 сая фунт стерлингийн үнээр ирж байсан юм. Бастиан Швайнштайгер өнөөг хүртэлх хугацаанд “Манчестер Юнайтед”-ын төлөө бүх тэмцээний хүрээнд 35 тоглолтод л оролцоод байсан. Улмаар энэ улирал Жосе Моуриньогийн удирдлага дор лигийн цомын тэмцээний 4 тоглолтод л талбайд гарсан бөгөөд Английн "Премьер лиг"-ийн нэг ч тоглолтод оролцоогүй учраас багаасаа явах шийдвэрийг гаргасан. 32 настай Герман хагас хамгаалагч АНУ-ын дээд лиг "Мэйжор лиг Соккер" тэмцээний "Чикаго Файр" багтай нэг жилийн гэрээ байгуулсан бөгөөд АНУ-ын багаас 4.5 сая ам доллар буюу 11.5 тэрбум төгрөгөөр цалинжих юм.

2014 оны дэлхийн аварга, ДАШТ-ий хошой хүрэл медаль Бастиан Швайнштайгер анх 2004 онд Германы шигшээ багт дуудагдаж байсан бөгөөд 2016 оны 8-р сард зодог тайлах хүртлээ нийт 121 тоглолтод талбайд гарч 24 гоолыг оруулсан бахдам амжилттай шилдэг тамирчин ч өнөө жилүүдэд өөрийн карьерийн сүүлжийн жилүүдийг үдэж байгаа юм.