“Болор цом”-ын эзэд өнөөдөр чуулна

“Болор цом”-ын эздийн цэнгүүн өнөөдөр 19:00 цагаас Соёлын төв өргөөнд болно. Цэнгүүнийг МҮОНРТ, МЗЭ-ийн хороо хамтран зохион байгуулах юм.

Олимпийн наадмыг МҮОНРТ бүрэн эрхтэйгээр шууд дамжуулдаг. Харин ирэх наймдугаар сард эхлэх “Рио-2016” олимпийг мөн шууд дамжуулах ч төсөв тааруу байгаа тул дээрх цэнгүүний тасалбарын орлогыг нэмэрлэх гэж буй юм.

Цэнгүүнд Монгол Улсын хөдөлмөрийн баатар, төрийн шагналт, ардын уран зохиолч Д.Пүрэвдорж агсны “Хүн төрөлхтөнд өргөх шүлэг”-ийг нэвтрүүлэгч Б.Ганбаатар унших бол Монгол Улсын төрийн шагналт, соёлын гавьяат зүтгэлтэн, ардын уран зохиолч Д.Цоодол “Миний муусайн найз нар”, “ Хуучин дэр модны тууль”, “Нэр нь тодроогүй баатруудын хөшөөнд өргөх шүлэг”-ээ, Б.Лхагвасүрэн “Шагнал”, “Ижийтэйгээ байхад би баян байсан”, “ Хил дээр бичсэн шүлэг”-ээ, яруу найрагч, зохиолч, сэтгүүлч, эмч Т.Очирхүү агсны “Чулууны магтаал”-ыг Монголын радиогийн нэвтрүүлэгч Д.Сайнтод, Монгол Улсын төрийн шагналт, соёлын гавьяат зүтгэлтэн, ардын уран зохиолч П.Бадарч “Тэмээ”-гээ, Т.Галсан “Жирмийн сүлжээ”-гээ, Ц.Чимэддорж агсны “Малчин”, “Элсэн тасархай ” шүлгийг дэлгэцнээс, Б.Ичинхорлоо “Бүргэд”-ээ, Монгол Улсын соёлын гавьяат зүтгэлтэн Ц.Хулан “Москвад өгөх сануулга”, “Ази”-аа, яруу найрагч Б.Доржпалам “Хөөрлийн шүлэг”-ийг дэлгэцнээс, Монгол Улсын төрийн шагналт, соёлын гавьяат зүтгэлтэн Д.Төрбат “Ижий”-гээ, МЗЭ-ийн дарга Г.Мөнхцэцэг “Янжинлхам бурханд гуйж мөргөх шүлэг”-ээ, Төрийн шагналт, яруу найрагч Ц.Бавуудорж “Хүрэл чоно”-оо, А.Эрдэнэ-Очир “Зам”-аа, зохиолч, яруу найргийн бичгийн сод туурвигч Д.Урианхай “Шөнийн онгоц”-оо, Ж.Баяржаргал “Дарангуйллын хаан оршиг”-оо, Ж.Мөнхбат “Бурхан хүсэл”-ээ, Б.Галсансүх “Бурханд хэлэх зөвлөгөө”, Ш.Лхамноржмаа “Газрын үг”-ээ, Л.Хасар “Миний нэг өдөр”-өө, Х.Эрдэнэбаатар “Зуун дамжсан суварга үгс”-ээ, Д.Болдхуяг “Монгол хэл”-ээ, Н.Гантулга “Уулсын сэтгэлгээний тэлэлт”-ээ, Л.Моломжамц “Хэзээ ба хожмыг өгүүлэх зангирмал үгс”-ээ, Б.Мягмаржав “Тэнгэрийн татах хүч”-ээ, Ц.Эрдэнэбаатар “Суурин иргэншлийн цаг”-аа унших юм. Мөн тэдний шүлгээр бүтсэн дууг Монгол Улсын ардын жүжигчин А.Долгор, гавьяат жүжигчин Д.Түвшинтөгс, Г.Ариунбаатар, дуучин Л.Чулуунбаатар, Х.Батмэнд, О.Баянмөнх нарын зэрэг уран бүтээлч сонордуулна.