"Доха-2019"-ийн анхны аварга тодорлоо

Катарын нийслэл Доха хотноо эхэлсэн хөнгөн атлетикийн 17 дахь удаагийн ДАШТ-ий анхны медальтнууд тодорлоо.

Энэ сарын 27-28-нд шилжих шөнө буюу орон нутгийн цагаар шөнийн 00 цагаас эмэгтэйчүүдийн марафон гүйлтийн тэмцээн эхэлсэн юм. Энэ нь шөнө дунд болж буй анхны ДАШТ-ий зай, төрөл болов. Үүнд 41 орны 71 тамирчин бүртгүүлсэн ч гараанаас 68 нь уралдав.

Ийнхүү Кенийн Рут Чепнгетич 2 цаг 32 минут 43 секундын амжилтаар түрүүлж, энэ удаагийн ДАШТ-ий анхны алтан медалийг зүүлээ. Мөнгөн медалийг Бахрайны нэрийн өмнөөс уралддаг, кени бүсгүй, 2017 оны дэлхийн аварга, Азийн наадмын аварга Роуз Челимо 2:33:46 амжилтаар, хүрэл медалийг Намиби Улсын марафонч Хелалиа Йоханнес 2:34:15 амжилтаар хүртлээ.

Дэлхийн хошой аварга, нэг мөнгөн медальт Эдна Киплагат медальтнуудын араас барианд орж, Беларусийн В.Мазуронак "айргийн тавд" багтав.

Эхний 10-т АНУ, Япон, БНАСАУ, Канад, БНАСАУ-ын тамирчид дарааллаар барианд орсон.
Манай улсын тамирчин Галбадрахын Хишигсайхан 2:56:15 амжилтаар 25 дугаар байрт, Баярцогтын Мөнхзаяа 3:02:57 амжилтаар 34 дүгээр байрт орлоо.

Марафон гүйлт бол хөнгөн атлетикийн хамгийн хүнд төрөлд тооцогддог. 42 километр замыг дунджаар 2 цаг хагасын хугацаанд гүйж туулна гэдэг амаргүй. Тиймээс ч марафон гүйлтэд цөөнгүй тамирчин замын дундаас гардаг бөгөөд барианд орохыг амжилттай оролцсонд тооцдог билээ.