"Эдмонтон Ойлерс" 11 дэх ялалтаа авлаа

Өнөөдөр Хойд Америкийн мөсөн талбайд 6 тоглолт боллоо. Сүүлийн 2 тоглолтдоо дараалан хожоод байсан лигийн 6 удаагийн аварга алдарт “Чикаго Блэкхокс” улирлын 20 дахь тоглолтоо “Эдмонтон Ойлерс”-ын эсрэг хийлээ.

Канад улсын Эдмонтон хотноо болсон энэ тоглолтод талбайн эзэд шилдэг тоглолтоо үзүүлж, 3 үеийн турш өрсөлдөгчөө илүүрхэн тоглосон байна. Швед хамгаалагч Оскар Клефбом, Словак хамгаалагч Андрей Секера, Орос довтлогч Антон Слепышев нар тус бүр нэг гоолыг оруулсан бол Герман довтлогч Леон Драйзайтль 2 шайбыг хаалганд оруулж, Эдмонтон өрсөлдөгчөө 5:0-ийн харьцаатай хожсон. Энэ тоглолтын баатар, өдгөө 21 настай Герман довтлогч Леон Драйзайтль улирлын 20 тоглолтод бүгдэд нь оролцож, 6 гоол оруулан, 8 оновтой дамжуулалт өгөөд байгаа юм.

Түүний хувьд 2014 оны драфтын 3 дахь сонголтоор Эдмонтоны эгнээнд нэгдсэн бөгөөд энэ улирлаас багийнхаа довтолгоонд голлох байр эзлэх болсон. “Эдмонтон Ойлерс” багийн хувьд ийнхүү бүсийн хүчтэй өрсөлдөгчөө хожиж, 23 оноотой болсоноор өрнөд бүсийн 3-р байрт бичигдэж байна. Харин Чикаго хотын “Хар харцагууд” 13 хожсон амжилтаараа өрнөд бүсийг тэргүүлсэн хэвээр байгаа юм.