Эмэгтэй волейболчид эхний тоглолтоо Вьетнамын багтай хийнэ

18 дахь удаагаа болж буй Ази тивийн эмэгтэйчүүдийн волейболын аварга шалгаруулах тэмцээний энэ жилийн онцлог нь олимпийн эрх олгох юм. БНХАУ-ын Тяньжин хотноо эхэлсэн тус тэмцээний эхний тоглолтыг манай эмэгтэй волейболчид өнөөдөр хийнэ.

Вьетнамын багтай таарсан энэхүү тоглолт өнөөдөр Бээжингийн цагаар 14:00-өөс болно. Тэмцээнд 14 улсын баг оролцож байгаагаас "С" хэсэгт Япон, Вьетнам, Монголын багууд багтсан. Өчигдөр "С" хэсгийн Япон-Вьетнамын тоглолт болоход Вьетнамын баг хүчтэй өрсөлдөгч Японы багийг 3:2-оор хожсон юм. Ингэснээр тэд хэсгээ тэргүүлж эхэллээ.

Мөн "А" хэсгээс Иран, "В" хэсгээс ХонгКонг, Тайланд, "D" хэсгээс Австрали, БНСУ-ын багууд эхний тоглолтдоо хожжээ.