"Флорида Пантерс" Детройтыг талбайд нь хожлоо

Хойд Америкийн мөсөн талбайд өнөөдөр 12 тоглолт боллоо. Лигийн түүхт 100 дахь улирал эхлээд 30 баг тус бүр 22-25 тоглолтыг хийгээд байна. Өнөөдөр Стэнлийн цомын 11 удаагийн эзэн, алдарт "Детройт Редвингс" өөрийн талбайдаа дорнод бүсийн хүчтэй өрсөлдөгч "Флорида Пантерс"-ыг хүлээн авсан юм. Детройтын “Улаан жигүүрүүд” энэ өдрийн тоглолтыг тун эрч хүчтэй эхлүүлсэн. Шүүгч шайбыг тоглолтод оруулсанаас хэдхэн секундын дараа Хенрик Зеттерберг гоолын салхийг хагалж, “Жое Луйс Арена”-д цугласан хорин мянга гаруй хөгжөөн дэмжигчдээ баярлуулсан. Өдгөө 36 настай Шведийн шигшээ багийн довтлогч Зеттерберг шинэ улирал эхлээд 24 тоглолтод оролцож, 4 гоол оруулан 12 оновчтой дамжуулалт өгөөд байна. Харин энэ үеийн төгсгөлд Флорида хотын хоккейчид тооны харьцааг тэнцүүлж чадсан. Энэ удаад “Пантерс”-ийн шилдэг хамгаалагч Жейсон Демерс тэнцээний гоолыг оруулсанаар энэ улирлын 3 дахь гоолоо бүртгүүлсэн юм. Улмаар тоглолтын 2, 3-р үед багууд ширүүн өрсөлдөөнийг үзүүлж байсан ч аль аль нь гоол оруулж чадаагүй. Улмаар тоглолтын ялагчийг нэмэлт цагт шийдвэрлэж, энэ үеийн 2 дахь минутад Финлянд довлогч Александр Барков хожлын гоолыг оруулсан. Ийнхүү Флоридачууд хүчтэй өрсөлдөгчөө талбайд нь хожсоноор улирлын 12 дахь ялалтаа авч, 26 оноотой боллоо. Тэд дорнод бүсийн 11-р байрт бичигдэж байгаа бол “Детройт Редвингс” нэг онооны дутуутай удаах байрт лигийн тэмцээнийг үргэлжлүүлж байна.