Г.Ган-Эрдэнэ өнөөдөр шөвгийн наймд үлдэх эрхийн төлөөх тулаанаа хийнэ

Бразилийн Рио-де-Жанейро хотноо олимпийн XXXI наадам өчигдөр хоёр дахь өдрөө үргэлжлэн өндөрлөлөө. Боксын тэмцээний эрэгтэйчүүдийн 69 кг-ын жинд өрсөлдсөн Монгол Улсын тамирчин Б.Түвшинбат Аргентиний боксчин Палмэтта Албертог хожиж, шөвгийн 16-д үлдсэн.

Харин 49 кг-ын жинд эхний тойрогтоо хийлсэн Г.Ган-Эрдэнэ өнөөдөр шөвгийн наймд үлдэх эрхийн төлөөх тулаанаа хийнэ.

60 кг-д Дэлхийн чансааны хоёрт бичигдэж буй Д.Отгондалайгийн хувьд эхний тойрогт хийлж, шилдэг 16-д үлдээд байгаа. Түүний дараагийн тулаан маргааш болно. Тэрбээр Нидерланд, Тайваны боксчдын аль хожсонтой нь шөвгийн наймд үлдэх эрхийн төлөө тоглох юм.

52 кг-д Х.Энх-Амар эхний тойрогт Мексикийн Эмигдио Абарсатай тулалдана. Энэхүү тулаан наймдугаар сарын 13-нд болно.

56 кг-д Э.Цэндбаатар Кенийн тамирчин Нжангури Бэнсон Гичаритой наймдугаар сарын 10-нд тулалдана.

64 кг-д Б.Чинзориг Катарын Тарумалингамтай Туласитай наймдугаар сарын 10-нд мөн адил рингэнд гарна.