Хүндийг өргөлтийн залуучуудын УАШТ болж байна

Төрийн хошой “Алтан гадас” одонт Т.Самбуу агсны нэрэмжит хүндийг өргөлтийн энэ оны залуучуудын улсын аварга шалгаруулах тэмцээн Улаанбаатар хотноо эхэллээ. Энэ удаагийн Залуучуудын УАШТ-д эрэгтэйчүүдийн долоо, эмэгтэйчүүдийн зургаан жинд хот, хөдөөгийн 13 байгууллагын 80 гаруй тамирчин өрсөлдөж аваргуудаа тодруулна.

Өнөөдөр эмэгтэй 48, 53, 58, 63, эрэгтэй 50, 56, 62 кг-ын жингийн аваргууд тодорно. Харин маргааш эрэгтэй 69, 77, 85, +85, эмэгтэй 69, +69 кг-ын жингийн тэмцээн болж, улсын аварга шалгаруулах тэмцээн өндөрлөнө.

Одоогоор эмэгтэйчүүдийн 48 кг-ын жинд “Самбуу сан” клубын тамирчин спортын мастер Ч.Нямзул огцом өргөлтөөр 63 кг-ыг өргөж өсвөр, залуучууд, насан хүрэгчдийн улсын рекорд амжилтыг ахиулсан байна. Мөн энэ жинд Өвөрхангай аймгийн тамирчин А.Энхбаяр спортын дэд мастерын болзол хангажээ. Тэмцээний дүнг эргэн хүргэнэ.