М.Дөлгөөн өнгөрсөн жилийн амжилтаа ахиулж Делид үзүүрлэв

Энэтхэгийн Шинэ Делид болж буй чөлөөт бөхийн насанд хүрэгчдийн Азийн АШТ-ий эхний өдөр Налайх дүүргийн тамирчин ОУХМ Мөнхболдын Дөлгөөн эмэгтэйчүүдийн 55 кг-ын жинд мөнгөн медалиар Монголын багийн салхийг хагалав.

Тэрбээр хэсгийн эхний барилдаанд Казахстаны Марина Зуевад 8:11-ээр ялагдсан ч удаах барилдаанд БНСУ-ын Ким Жин Хи, хагас шигшээд өнгөрсөн жилийн Японы аварга Кана Хигашикаваг тус бүр цэвэр ялсан.

Алтан медалийн төлөөх барилдаанд эзэн орны Пинкитэй хүч үзэж 1:2-оор ялагдлаа. М.Дөлгөөн өнгөрсөн жил БНХАУ-ын Шианьд болсон тивийн аваргаас хүрэл медаль хүртэж байсан бөгөөд ийнхүү Делид амжилтаа ахиулж үзүүрлэв.