Мэргэжлийн сүмогийн энэ оны сүүлийн башё эхэллээ
Эхний өдрийн барилдаанд гурван монгол аварга, дөрвөн озеки барилдаж том цолтнуудын ирц бүрджээ. Өнгөрсөн сарын барилдаанд гэмтлийн улмаас барилдаагүй 69, 70 дахь аваргууд эхний өдөр өрсөлдөгчөө давлаа.
Мэдээллийн алба
Японы мэргэжлийн сүмогийн энэ оны сүүлийн башё буюу арваннэгдүгээр Кюүшюү башё эхэллээ. Эхний өдрийн барилдаанд гурван монгол аварга, дөрвөн озеки барилдаж том цолтнуудын ирц бүрджээ. Өнгөрсөн сарын барилдаанд гэмтлийн улмаас барилдаагүй 69, 70 дахь аваргууд эхний өдөр өрсөлдөгчөө давлаа. Харин анх удаа башёгийн тэргүүн бөх болсон 71 дэх ёкозүна Какүрюү М.Ананд комосүби Ёшиказетэй барилдаж унав.
Энэ өдрийн бас нэгэн гол барилдаан Тэрүнофүжи, Ичиножёо нарын дунд болж, залуу арслан хүчтэй өрсөлдөгчөө барьцыг нь тавиулж эхний ялалтаа байгууллаа. Өнөөдөр их аварга Хакүхо нутгийн бөх Ичиножёо А.Ичинноровтой, Харүмафүжи Маэгаширагийн нэгээс эрэмбэлэгдсэн Оосүнарашитэй, Какүрюү Аояамитай тус тус барилдана. Тэрүнофүжи өнөөдөр Точиозантай хүч үзнэ.
