Нагоя башёд 11 монгол сумоч барилдана

Мэргэжлийн сумо бөхийн долоодугаар сарын буюу Нагоя башёгийн банцүкэг зарласнаар Макүчид Монголын 11 бөх хүчээ сорин барилдана. Энэхүү дээд зиндааны бөхчүүдийн магнайд өмнөх тэмцээний түрүү бөх 69 дэх Их аварга Хакухо М.Даваажаргал зүүн жигүүрийг тэргүүлэх бол баруун жигүүрийг 70 дахь Их аварга Харумафүжи Д.Бямбадорж манлайлж ард нь 71 дэх Их аварга Какурюү М.Ананд бичигджээ.

Өнгөрсөн башёд 50 хувийн амжилтаа биелүүлж чадаагүй Котоошигикү озеки кадобан болж, харин Аминишики, Аояама нар комүсиби цолтой барилдана. Нагоя башёд барилдах манай бусад бөхийн хувьд Тамаваши зүүний дөрөв, Тэрүнофүжи зургаа, Кёкүтэнхо зүүний 12, Кёкүшюхо барууны 12, Кагамио зүүний 14, Азумарюү барууны 14, Токитэнкү барууны 15, Араваши зүүний 17-д тус тус эрэмбэлэгджээ.