О.Ууганбаатар: “Монголын нинжа дайчид” тэмцээн дахиж зохиогдвол хамгийн түрүүнд бүртгүүлнэ

Токиогийн “Их дуулга”-д түрүүлсэн Монголын анхны эрэгтэй жүдоч, Үндэсний шигшээ баг, “Сүлд” спорт хорооны тамирчин, ОУХМ Отгонбаатарын Ууганбаатартай ярилцаж, МҮОНТ-ээс зохион байгуулж буй “Монголын нинжа дайчид” тэмцээнд оролцсон сэтгэгдлийг нь сонсов. Сонирхуулахад, тэрбээр ДАШТ-д хоёр ч удаа V байрт шалгарч байснаас гадна Азийн АШТ-ий хошой хүрэл, улсын таван удаагийн алтан медаль хүртэж байсан билээ.

-Өчигдөр таны оролцсон шоу үзэгчдэд хүрлээ. Үзэгчид хэрхэн хүлээж авав. Тань руу холбогдож байна уу?

-Их сайхан хүлээж авч байна билээ. Ялангуяа найзууд, гэр бүлийнхэн маань тэсэн ядан хүлээж байгаад үзсэн гэсэн.

-Энэ тэмцээнд оролцоход юу нөлөөлсөн бэ?

-“Энэ шоуг хэрвээ Монголд болох юм бол өөрийгөө сориод үзнэ ээ” гэж бодож байсан тэгээд л оролцсон.

-Аль улсад болсон нь хамгийн их таалагдсан бэ. Мөн телевизээр үзэж байхдаа хялбар юм шиг санагддаг байсан уу?

-АНУ-д болдгийг нь үзэж байсан. Телевизээр үзэж байхдаа “Гайгүй юм байна” гэж харж байсан ч биеэрээ мэдрэхээрээ хүнд юм байна шүү.

-Таны хувьд оногдсон даалгавараа сайн гүйцэтгэсэн ч харамсалтай нь хугацаандаа амжаагүй. Юунаас шалтгаалсан гэж бодож байна вэ?

-Гутлын ул, гар их халтирч гулгаад ярвигтай юм байн билээ. Нэлээн л авхаалж самбаа шаардсан, сайхан шоу болсон. Дахиж зохиогдвол хамгийн түрүүнд бүртгүүлж ялагч болохыг хичээнэ ээ.

- Тэмцээний зохион байгуулалт ямар санагдсан бэ?

-Тэгэлгүй яах вэ, зохион байгуулалт маш өндөр болсон. Олон улсын жишигт тэнцэхээр байсан шүү. Бусад оролцогчид ч ам сайтай, сэтгэл хангалуун байсан.

-Бөхийн спортоор хичээллэдэг тань давуу тал болох байх гэж үзэгчид харж байсан. Ер нь энэ спортын ач тус гарсан биз дээ ...

-Бөхийн спортын ачаар л нэгдүгээр үеийг давж, хоёрдугаар даалгавар руу орсон байх.

-Энэ тэмцээний бэлтгэлээ хаана хийсэн бэ. Хангалттай хийж амжсан байсан уу?

- Жүдогийн бэлтгэлээ хийж байгаад л орсон. Тусгайлан бэлтгэл хийж амжаагүй ээ.

-Өөрийн тань хувьд хамгийн хэцүү даалгавар юу байсан бэ?

-Хоёр шилний хооронд явах л жаахан хэцүү байлаа. Тоосжилт ихтэй халтиргаатай юм билээ. Манай нөхцөлд заал юм уу вакум орчинд хийвэл зүгээр юм шиг санагдсан.

-Хэрвээ цагтаа амжсан бол дараагийн шатанд яах байсан бол ...

-Ер нь давчих байх гэж бодож байсан. Түүнээс биш хугацаа дуусчих вий гэж сандарч, тэвдээгүй. Ямарч байсан даалгавараа дуусгах ёстой л гэж бодож, зүтгэсэн ч даанч амжаагүй. Ядаж 20 сэкунд байсан бол болчих байлаа.

-Ер нь өөрийгөө хэддүгээр шат хүртэл явна гэж бодож, төлөвлөж байсан бэ?

-Хоёрдугаар үеийг давчуул болчих байх гэж бодож байсан.

-Таныг Монгол Улсын хөдөлмөрийн баатар, гавьяат тамирчин Х.Цагаанбаатар турникэд сайн гэж байсан. Өөртөө бардсан тал байгаагүй биз дээ ...

-Тийм зүйл байгаагүй ээ. Турникт сайн хичээллэдэг байсан минь эерэгээр нөлөөлснийг хэлэх хэрэгтэй байх.

-Ярилцсанд баярлалаа.