Шатар "Цагаан олимп"-д багтсангүй

Дэлхийн хэмжээний спорт болох шатрыг оюуны спортын хэмжээнд дээдэлдэг юм. Тэгвэл уг спортыг хүн төрөлхтний эв нэгдлийн дээд болсон олимпийн спортын хөтөлбөрт багтаахаар шатрын спортын зүтгэлтнүүд ажиллаж байна.

Монте-Карлод болсон Олон улсын олимпийн хорооны /OIC/ гишүүдийн хурлаар шатрыг өвлийн олимпийн наадмын хөтөлбөрт оруулахыг дэмжсэнгүй. "Цагаан олимп"-ийн хөтөлбөрт багтахын тулд цас юм уу, мөсөн дээр тоглодог спорт байх ёстой гэж хурлын төлөөлөгчдийн дийлэнх нь үзсэний улмаас дээрх шийдвэрийг гаргажээ.

Гэвч FIDE-гийн ерөнхийлөгч Кирсан Илюмжинов "Бүх зүйл ингээд дуусчихгүй. Шатрын спортыг олимпийн наадмын хөтөлбөрт багтаахын төлөө үргэлжлүүлэн тэмцэнэ" гэсэн байна.