Таван тамирчин Мадрид хотод болох гран при тэмцээнд оролцоно

Чөлөөт бөхийн эрэгтэй шигшээ багийн тамирчид ирэх долоодугаар сарын 9-10-нд Испанийн Мадрид хотын “Pabellуn Exterior del CSD C” спорт цогцолборт болох гран при тэмцээнд оролцоно.

Олимпоос өмнө болох олон улсын чанартай тэмцээн энэ юм. Тиймээс тэд дээрх тэмцээнд амжилттай оролцохын тулд Орхон аймгийн “Олимп” баазад олимпийн үндсэн бэлтгэл, сургуулилтаа хамтатган базааж байна.

Тэмцээнд 57 кг-д Э.Бэхбаяр, 65 кг-д Г.Мандахнаран, 74 кг-д П.Өнөрбат, 86 кг-д О.Үйтүмэн, 96 кг-д Д.Хүдэрбулга өрсөлдөх бол дасгалжуулагчаар гавьяат тамирчин Ц.Цогтбаяр, Б.Баяраа, Ц.Баярсайхан, шүүгчээр Б.Алтангадас ажиллана.

Сонирхуулахад, 2013 оны тус тэмцээнд эмэгтэй 55 кг-ын жинд С.Бямбацэрэн, 72 кг-ын жинд О.Бурмаа нар хүрэл медаль хүртэж байсан билээ.