Үндэсний их баяр наадамд Э.Оюунболд түрүүлж, Монгол Улсын арслан боллоо

Тулгар төрийн 2224, Их Монгол Улс байгуулагдсаны 809, Ардын хувьсгалын 94 жилийн ойн их баяр наадмын хүчит бөхийн барилдааны есийн даваанд Хэнтий аймгийн Өмнөдэлгэр сумын харьяат Э.Оюунболд түрүүлж, Улсын арслан боллоо.

Тэрбээр Увс аймгийн Давст сумын харьяат, Улсын Арслан П.Бүрэнтөгсөөр ес давж түрүүлсэн юм. Ийнхүү Дархан аварга Б.Бат-Эрдэнийн нутгаас шинэхэн арслан төрлөө. Монгол Улсын Арслан цолны болзол хангасан Э.Оюунболдод Ерөнхийлөгчийн зарлигийг уншиж танилуулан Арслан цолны үнэмлэх, тэмдгийг нь гардуулан баяр хүргэлээ.

Дашрамд дурдахад, энэ жилийн үндэсний их баяр наадамд улсын цолтон 86, аймаг, цэргийн цолтон 205, сумын цолтой болон залуу бөх 221, нийт 512 бөх уран мэхийг уралдуулан барилдаж хоёр өдргийн турш наадамчин олны мэлмийг баясгалаа.