ОХУ, Украин, АНУ-ын энхийн хэлэлцээ Абу Дабид үргэлжилж байна
Мэдээллийн алба
Украины дайныг зогсоох асуудлаарх ОХУ, Украин, АНУ-ын гурван талын хэлэлцээ Арабын Нэгдсэн Эмират Улсын нийслэл Абу Дабид хоёр дахь өдрөө үргэлжилж байна.
АНУ-ын зуучлалаар арваннэгдүгээр сарын 10-нд эхэлсэн хэлэлцээний эхний өдөр дөрвөн цаг орчим үргэлжилсэн байна. Талууд дайны олзлогдогсдыг солилцох, хүмүүнлэгийн асуудлыг шийдвэрлэх, Украины аюулгүй байдлыг хангах баталгааны талаар санал солилцжээ.
Украины Ерөнхийлөгч Владимир Зеленский эхний өдрийн хэлэлцээг ажил хэрэгч, үр дүнтэй болсныг тэмдэглэж, олзлогдогсдыг өргөн хүрээнд солилцох асуудалд ахиц гаргахыг зорьж байгаагаа мэдэгдсэн байна.
АНУ-ын Төрийн нарийн бичгийн дарга Марко Рубио мөн хэлэлцээг үр дүнтэй гэж үнэлсэн ч дайныг зогсоох тохиролцоонд хүрэхийн тулд шийдвэрлэх олон асуудал байгааг онцолжээ.
Хэлэлцээнд АНУ-ын Ерөнхийлөгчийн тусгай төлөөлөгч Стив Уиткофф, Жаред Кушнер нар оролцож байгаа бол Украины төлөөлөгчдийг Рустем Умеров, ОХУ-ын төлөөлөгчдийг Владимир Мединский ахалж байна.
Гурван талын уулзалтын өмнө Украины төлөөлөгчид Европын орнууд, Европын Холбоо болон НАТО-гийн албаныхантай тусад нь уулзжээ. Европын орнууд Украины аюулгүй байдалтай холбоотой аливаа тохиролцоонд өөрсдийн оролцоо чухал гэж үзэж байгаа юм.
ОХУ, Украины хооронд газар нутгийн асуудлаарх саналын зөрүү хэвээр байна. Москва Донбассын бүс нутгийн талаар тавьсан шаардлагаасаа ухраагүй бол Киев газар нутгаа шилжүүлэн өгөхийг эсэргүүцэж, гал зогсоох, аюулгүй байдлын баталгаа авахыг шаардаж байна.
Хэлэлцээг үргэлжлүүлэхээр тохиролцсон ч талууд гал зогсоох болон энхийн гэрээ байгуулах талаар эцсийн шийдвэрт хүрээгүй байна.
