Энхийг сахиулагчид эх орондоо ирлээ
Мэдээллийн алба
БНӨСУ-д явагдаж байгаа НҮБ-ын энхийг сахиулах “UNMISS” ажиллагаанд үүргээ амжилттай гүйцэтгэсэн Монгол Улсын Зэвсэгт хүчний 15 дугаар ээлжийн мотобуудлагын батальоны нэгдүгээр ээлжийн бүрэлдэхүүн эх орондоо ирлээ.
Монгол Улсын Зэвсэгт хүчний 15 дугаар ээлжийн цэргийн баг нь 2025 оны 09 дүгээр сард ажиллагааны газар орныг зорьж, НҮБ-ын мандатаар хүлээсэн үүрэг болох орон нутгийн иргэдийн аюулгүй байдлыг хангах, хүмүүнлэгийн ажилтнуудыг хамгаалах, зэвсэгт халдлага, мөргөлдөөний үед шуурхай арга хэмжээ авах даалгавруудыг мэргэжлийн өндөр түвшинд, нэр төртэй биелүүлсэн байна.
Үүний зэрэгцээ ажиллагааны газар оронд олон улсын цэргийн багуудын хамтын ажиллагааг бэхжүүлэх, Монгол Улсын соёл, уламжлалыг сурталчлах ажлыг амжилттай зохион байгуулжээ.
Өнгөрсөн нэг жилийн хугацаанд даян дэлхийн энх амгалангийн үйл хэрэгт хүчин зүтгэж, НҮБ болон Монгол эх орон, төр, ард түмнийхээ өмнө хүлээсэн үүргээ амжилт дүүрэн гүйцэтгэсэн эдгээр цэргийн алба хаагчдыг ЗХЖШ-ын орлогч дарга хошууч генерал Б.Баатар, Энхийг дэмжих, цэргийн хамтын ажиллагааны хэлтсийн дарга хурандаа Д.Мягмаржав нар угтаж, баяр хүргэсэн юм.
Угтан авах ажиллагааны үеэр ЗХЖШ-ын орлогч дарга хошууч генерал Б.Баатар энхийг сахиулагчиддаа хандан, дэлхийн халуун цэгт Монгол цэргийн сахилга бат, тэсвэр хатуужил, ур чадварыг дахин тунхаглаж, үүргээ нэр төртэй гүйцэтгээд ирсэнд талархал илэрхийлэв.
