ЗХЖШ-ын даргын тушаалаар 2020 оны нэгдүгээр ээлжийн цэрэг татлагаар Зэвсэгт хүчний 032 дугаар ангид Өвөрхангай аймгийн Хархорин, Бүрд, Баян-Өндөр, Сант, Баянгол, Төгрөг сумаас хугацаат цэргийн албанд татагдсан цэргүүд халагдлаа. “Ковид-19” халдвараас шалтгаалан алба хаагчдыг аймгийн Цэргийн штабын дарга, хурандаа М.Дэлгэрсайхан, тоо бүртгэлийн офицер, дэд хурандаа Б.Өлзийбаяр нар Өвөрхангай, Архангай, Булган, Төв аймгийн нутгийн зааг дээр орших хяналтын цэг дээр тосон авч сум, орон нутгийн удирдлага болон гэр бүлийнх нь хамт тосон авах уулзалт зохион байгуулав.

Зэвсэгт хүчний 032 дугаар ангид алба хаасан дайчдаас Сант сумын харьяат байлдагч У.Билгүүн ангидаа ахлагчийн албан тушаалд томилогдон дэд ахлагч цол авчээ. Харин дэд түрүүч Г.Мөнх-Ёндон, байлдагч Г.Нанзад, А.Доржпүрэв нар Хуурай замын цэргийн командлал, Тусгай хүчний цэргийн командлалын харьяа ангиудад ахлагчийн болон цэргийн гэрээт албанд орох хүсэлтээ өгсөн байна.

Эх сурвалж: “Соёмбо мэдээ” цахим сонин