Авлигатай тэмцэх газраас “Зам дагасан авлига” сэдэвт хэлэлцүүлгийг 2022 оны 11 дүгээр сарын 18-ны өдөр зохион байгууллаа.

Хэлэлцүүлэгт Зам, тээврийн хөгжлийн яам, Цахим хөгжил, харилцаа холбооны яам, Авто замын хөгжлийн газар, Нийслэлийн авто замын хөгжлийн төв, “Авто замчдын холбоо” ТББ-ын албан тушаалтнууд оролцож, тодорхой сэдвийн хүрээнд хэлэлцүүлэг өрнүүлэв. Тухайлбал, авто замын барилга барих эрх зүйн орчин, хэрэгжилт, зам тээврийн салбарын зураг төсөлгүй хөрөнгө оруулалт, зам тээврийн төслүүдийн хөрөнгө оруулалтын шийдвэр, төсөвт өртөг, чанаргүй баригдсан авто замуудын хор нөлөө, авто замын гадаргууны тэгш байдлыг үр дүнтэй хянаж шалгах, авто замын дагуух газар олголт, авто замын компаниудын ажил гүйцэтгэлийн түүх зэрэг сэдвүүдийн хүрээнд ярилцаж, өнөөгийн нөхцөл байдал, хүндрэл бэрхшээл, тулгамдсан асуудлуудыг хэлэлцлээ.

Тус хэлэлцүүлгийн эхэнд тодорхой бодит кейс, жишээн дээр тулгуурлан авто замын салбар дахь хууль, дүрэм журам хэрхэн хэрэгжиж байгааг харуулсан дүрс бичлэгийг үзүүлсэн бөгөөд холбогдох албаны хүмүүс тухайн асуудлуудаар дахин зөрчил, дутагдал гаргахгүй байх талаар байр сууриа илэрхийлж ярилцав.

Зам, тээврийн хөгжлийн яамнаас авто замын барилга байгууламж барих эрх зүйн орчин, норм нормативыг судалгаа шинжилгээний үндсэн дээр шинэчлэн баталж мөрдүүлэх, 2023 оноос зураг төсөлгүй замын ажлын тендер зарладаггүй болох, хэлэлцүүлгийн явцад дурдагдсан замын ажлын зөрчлүүдийг Зам, тээврийн хөгжлийн яамны Төрийн нарийн бичгийн дарга С.Батболд хянан үзэж шийдвэрлэн хариу мэдэгдэхээр тохиров.

Авлигатай тэмцэх газраас “Зам дагасан авлига” хэлэлцүүлгийн үеэр ярилцсан асуудлаар Зам, тээврийн хөгжлийн сайдад албан зөвлөмж хүргүүлэх, түүний хэрэгжилтэд тухай бүр хяналт тавьж ажиллана.