Зэвсэгт хүчний Жанжин штабаас Зэвсэгт хүчний удирдах бүрэлдэхүүний 2023 оны стратегийн цугларалтыг энэ сарын 23-25-ны өдрүүдэд амжилттай зохион байгуулсан. 

Тэгвэл Зэвсэгт хүчний Хуурай замын цэргийн нэгтгэл, ангиудын захирагч нарын цугларалт Хуурай замын цэргийн командлалд энэ сарын 26-ны өдөр үргэлжлэн явагдав.

Цугларалтыг нээж Хуурай замын цэргийн штабын дарга, хурандаа Ц.Буяндэлгэр үг хэлсэн бөгөөд тэрбээр 2023 онд нэгтгэл, ангиудад явагдах арга хэмжээ болон бэлэн байдал, штабын бэлтгэлжилт, цэргийн алба, сахилга хариуцлагын талаар мэдээлэл хүргэж, үүрэг чиглэл өглөө. Мөн тэрбээр алба хаагчдынхаа бие бялдар, сэтгэл зүйн бэлтгэлжилтээс нь эхлээд хувь хүний хөгжилд нь зайлшгүй анхаар, алба хаагч бүрийн мэдлэг, дадлага, чадвараас Хуурай замын цэргийн хөгжил шууд хамааралтайг ухамсарлаж, аливаа ажил, арга хэмжээгээ зөв төлөвлөж явуулахыг захиж байсан юм.

Үргэлжлүүлэн командлалын хэлтсийн дарга нар удирдлага, төлөвлөлт, цэргийн сургалт бэлтгэл, цэргийн алба, материал техникийн хангалтын талаар захирагч нартай санал солилцож, харилцан ярилцав.

Цугларалтын төгсгөлд Хуурай замын цэргийн командлагч, бригадын генерал Ч.Цогтжаргал цэргийн сургалтад агуулгын өөрчлөлт хийх, алба хаагчдын мэргэжлийн ур чадвар болон манлайллыг дээшлүүлэх, хандлага, бүтээлч сэтгэлгээг хөгжүүлэх, нийгмийн хамгаалал, алба хаах орчин нөхцөлийг сайжруулах, жишиг ногоон хотхон төсөл хэрэгжүүлэх, хөдөлмөрийн аюулгүй байдалд анхаарах зэрэг олон асуудлаар үүрэг чиглэл өгч, ажил албанд нь өндөр амжилт хүслээ.

Энэ үеэр мөн захирагч нартай Хуурай замын цэргийн нэгтгэл, ангиудын 2023 оны гүйцэтгэлийн төлөвлөгөөг байгуулж, баталсан юм гэж Зэвсэгт хүчний Жанжин штабаас мэдээллээ.