Ерөнхий сайд Английн мэдээллийн агентлагуудад ярилцлага өгөв

Шуурхай:

Ерөнхий сайд Английн мэдээллийн агентлагуудад ярилцлага өгөв

2015-07-02 08:56:00

ИБУИНВУ-д ажлын айлчлал хийж буй Ерөнхий сайд Ч.Сайханбилэг мэдээллийн томоохон агентлагууд болох “CNBC” телевиз, “Financial Times” сонин, “Ройтерс” агентлагт ярилцлага өглөө.

Ерөнхий сайд Ч.Сайханбилэг Монголын эдийн засгийн үзүүлэлтүүд болон хөрөнгө оруулагчдыг татах чиглэлээр хийж байгаа ажлуудынхаа талаар сэтгүүлчидтэй ярилцаж, сонирхсон асуултад хариулт өгсөн юм. Тэрбээр Монгол Улс бизнесийн салбарт эргэн ирсэн. Өнөөдөр Монгол Улсыг хөрөнгө оруулагчид анхааралтай харж байгаа. Өнгөрсөн жил манай улсын эдийн засаг 7.8 хувийн өсөлттэй гарсан. Гадаадын хөрөнгө оруулалт эдийн засагт богино хугацаанд эерэг нөлөө үзүүлдэг. Бид хөрөнгө оруулалтын тухай хуулийг шинээр боловсруулж баталсан. Уг хуулиар гадаад дотоод хөрөнгө оруулагч гэж ялгалгүйгээр бүгдэд нь ижил нөхцөл өгсөн гэдгийг ярилцлагуудын үеэр онцоллоо.

Монголын эдийн засаг зөвхөн уул уурхайгаас хамааралтай байх ёсгүй. Бид эдийн засгаа төрөлжүүлэх дээр ажиллаж байгаа. Монгол Улсад хөдөө аж ахуй, аялал жуулчлал гээд хөрөнгө оруулах олон салбар байна. Манай улс гурван сая хүн ам, өргөн уудам нутаг дэвсгэр, 60 гаруй сая толгой мал, 80 орчим төрлийн элементтэй 6000 гаруй байгалийн баялаг ордтой. Өнөөдөр эдийн засагт бий болж байгаа боломж бололцоог урт хугацаанд ашигтай байлгахад хүчин чармайлт гарган ажиллаж байна. Ерөнхий сайд “Бидний зүгээс хөрөнгө оруулагчдад өгч байгаа хамгийн чухал мессеж бол хөрөнгө оруулалт хийх, бизнес хамтын ажиллагааг өргөжүүлэх, эдийн засгийг төрөлжүүлэх бүх харилцаа чөлөөтэй. Хөрөнгө оруулагчдын хувьд Монголын үүд хаалга үргэлж нээлттэй байна” гэлээ.

	Ерөнхий сайд Английн мэдээллийн агентлагуудад ярилцлага өгөв
Үзсэн: 1201	Mongolian National Broadcaster

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.