Испанийн лигийн 24 удаагийн аварга “Барселона” клуб энэ тойрогт алдарт “Ноу Камп” цэнгэлдэх хүрээлэндээ өөрийн хотын “Эспаньол” клубыг хүлээн аван тоглолоо. Улирлын эхний 2 тоглолтдоо дараалан хожоод байсан “Барселона” клуб энэ тоглолтод өрсөлдөгчөө 5:0-ээр хожсон. Ингэхэд  дэлхийн 5 удаагийн шилдэг хөлбөмбөгчин, өдгөө 30 настай Лионель Месси эхний 3 гоолыг орууллаа. Улирлын эхний 2 тоглолтод оролцож, 2 гоол оруулаад байсан Месси энэ өдөр 3 гоол оруулсанаао “Барса”-гийн төлөөх 38 дахь “хет-трик”-ээ толилууллаа. Аргентины шигшээ багийн ахлагч, өдгөө 30 настай Лионель Андрес Месси одоогоор 3 тоглолтод талбайд гарч 5 гоол оруулсан амжилтаар Испанийн лигийн мэргэн буучдын жагсаалтыг ганцаар тэргүүлж байна. Түүний хувьд өнгөрсөн улирал лигтээ 34 тоглолтод оролцохдоо 37 гоол оруулж, бүх тамирчдыг тэргүүлсэн билээ.

Лионель Месси 2004 оноос "Барселона" клубын үндсэн багт тоглож, энэ хүртэлх хугацаанд 13 улирал 587 тоглолтод оролцон 510 гоол оруулсан гайхамшигтай амжилтыг үзүүлээд байгаа юм. Түүнчлэн багийнхаа хамтаар Испанийн "Ла лиг"-т 8 удаа, Испанийн эзэн хааны цомын тэмцээнд 5 удаа, Испанийн  Супер цомд 6 удаа, ЕХХ-ны "Аваргуудын лиг"-т 4 удаа, ЕХХ-ны Супер цомд 3 удаа, ОУХБХ-ны Клубуудын ДАШТ-д 3 удаа түрүүлээд байна.