Говь-Алтай аймгийн Шарга сумын нэгдүгээр багийн малчин Х.Гантөмөрийнд Шадар сайд, Улсын Онцгой комиссын дарга Ө.Энхтүвшин зочиллоо. Тэднийх аймгийн төвөөс 20 орчим км-т өвөлжиж байна. Шадар сайд Ө.Энхтүвшин гэрийн эзэнтэй нутаг орны байдал, малчдын ахуй амьдралын талаар хөөрөлдсөнөөс өвөлжилт болон өвс тэжээлийн хүрэлцээний тухай яриаг нь дор сийрүүлье.  

-Танайх хэдэн малтай вэ?

-Мянга шахам юм бий.

-Хэзээнээс хүйтрэв?

-Арванхоёрдугаар сарын 27-ны шөнө учиргүй хүйтрээд, тэгээд л ер нь нэг их дулаарсангүй. Одоо бол 46 градусаас дээш л хүйтэн хонож байна шүү.

-Цаг агаарын урьдчилсан мэдээгээр энэ сарын 30 хүргээд температур бага зэрэг буурах төлөвтэй. Танайханд нярай хүүхэд, жирэмсэн, өндөр настан бий юү?

-Байхгүй ээ.

-Малын хорогдол хэр байна?

-Өө, нэлээд хорогдлоо. Өвсөө дууссан арваннэгдүгээр сараас хойш 200-гаад мал үхсэн.

-Аймаг, сумаас өвс, тэжээл авсан биз дээ?

-Арванхоёрдугаар сард аймгийн Хөдөө аж ахуйн газраас 400 гаруй боодол өвс авсан. Одоо мөн л шувтарч байна. Идэш муутай болохоор мал харганаа хүртэл хамж идчих юм, тэгээд ам нь шархлаад байгаа.

-Засгийн газраас малчдад өвс, тэжээл хүргэж байгаа. Бас хожим төлөх зээлээр нэмж өвс, тэжээл олдох боломж бий шүү дээ.

-Ноосны мөнгө гэж багаар бодоход 400 мянган төгрөг авчих байх гэж бодож байгаа. 

-Өвлийн бэлтгэлээ ер нь хэдийнээс базаав. Хэдэн мал борлуулсан бэ?

-Өвлийн бэлтгэл базаахаар зунаас хойш л мал борлуулсан. Өнгөрсөн зун ган болоод хадлан гэж байхгүйтэй адил. Тэгээд нэг хонио 65 мянган төгрөгөөр тооцож зарсан даа.