Хүнээс хүн төрүүлнэ гэдэг аугаа их үйл хэрэг. Тиймээс ч бид олон хүүхэд төрүүлж өсгөсөн ээжүүдийгээ хайрлаж, хүндлэх, дэмжих үүднээс алдарт эхийн одонгоор энгэрийг нь цоолж, цөөхөн төгрөгөөр мялаадаг юм. Хуучин алдарт эхийн 2-р одонг 5 хүүхэд төрүүлсэн эхчүүдэд, 1-р одонг 7 хүүхэд төрүүлж, өсгөсөн ээжүүдэд олгодог байсныг өөрчилж, 2-р одонг 4 хүүхэд, 1-р одонг 6 хүүхэд төрүүлсэн эхчүүдэд олгодог болоод нэлээдгүй хугацааг ардаа хийж байна. Төрүүлсэн хүүхдээрээ хүн хийж авна гэдэг төрүүлэхтэй дүйцэхүйц “хүнд” хөдөлмөр гэх олны үг байдаг. Нэг ёсондоо аавууд төрсөн үрээ хүний дайтай өсгөх гэж ээжүүдээс дутуугүй зовж, зүтгэж, хөдөлмөрлөдөг бодит үнэн. Тиймээс ч ээж аавууд ялгалгүй гавьяа шагналыг хүртэх эрхтэй гэх “бор шувуу” хааяахан гарч л байдаг. Хэрэв үнэхээр олон хүүхэдтэй аавуудад “алдарт аав”-ын одон өгдөг бол хэн хэн энгэрээ цоолж болохыг тандаж үзэв.

Алдарт эхийн одон зүүсэн ээж бүрийн ард алдарт аавын одон зүүх аавууд байж таарна. Харин олны танил эрхмүүдээс хамгийн түрүүнд “алдарт аав”-ийн 1, 2-р одонгоор нэгэн зэрэг энгэрээ цоолох хүн бол ҮХАА-н сайд, “Женко” Х.Баттулга шинэ хуучин, гадаад, монгол хоёр эхнэрийн 9 хүүхэдтэй аав онцгойрч болох юм байна. Мэдээж олон сайхан хүүхдүүдийнх нь тоогоор” Таван толгой”-н хувьцаа үржигдэж таарна. Удаах байранд МУ-ын ерөнхийлөгч Ц.Элбэгдорж өөрийн 5 хүүхдийнхээ тоогоор “Алдарт аав”-ын одон зүүж таарах бол өргөж, өсгөж, өөриймсөж яваа хүүхдүүдийг нь нэмбэл “Алдарт аав”-ын “Гранпри” одонтой болж таарах юм.

Цаашлаад мөн л хуучин шинэ эхнэрүүдийн хүүхдүүд нь нийлээд 2-р одон бөөндөх тооны хүүхдүүдтэй аавуудаар БХ-ын сайд “Ажнай” Д.Бат-Эрдэнэ, “Буян”-ын Б.Жаргалсайхан нар удаалах нь. Түүнчлэн Гүйцэтгэх засаглалын тэргүүн Н.Алтанхуяг хуучин шинэ амьдарлынхаа нийт хүүхдүүдийн тоогоор 2-р одон авч таарах нь. Гэх мэт цуваа УИХ-ын гишүүн Сү.Батболд 7-22 насны 5 хүүхдийн аав, өнөр өтгөн өрхийн тэргүүн гэдгээрээ, УИХ-ын гишүүн асан Л.Гүндалай хуучин шинэ хоёр эхнэрийн таван хүүхэдтэйгээрээ, УИХ-ын гишүүн Д.Дэмбэрэл, УИХ-ын гишүүн, БШУ-ы сайд Л.Гантөмөр,  УИХ-ын гишүүн асан С.Баяр таван өөр ээжийн 6 хүүхэдтэй гэдгээрээ, НХХ-ийн сайд, УИХ-ын гишүүн С.Эрдэнэ хэдий том болсон ч таван сайхан хүүхдийн аав гэдгээрээ тус тус одон өгөөд хүндэтгэл үзүүлчихмээр үлгэр жишээ аавуудын цувааг өргөжүүлж өгөх нь.

Мэдээж олны танил улстөрчдөөс гадна урлаг, соёл, спорт, бизнесийнхэн гээд хөврөөд байж болохоор юм. Тиймээс ч Монгол улсын хүний нөөцөд боломжоороо анхаарал хандуулж, одон зүүхээр гавьяатай аавууддаа амжилт хүсч, одон биш юм гэхэд сайхан хүндлэл хүлээлгэхэд юуны буруу байх билээ.
Монголын үрс маш олон болтугай.