“Oxford” клубын үүсгэн байгуулагч, англи хэлний багш Ц.Майдараас цөөн асуултад хариулт авлаа. Тэрбээр хурдан хугацаанд, хялбар аргаар англи хэл сурах сургалтын арга барил, сурах бичиг боловсруулсан юм.

-Та манай уншигчдад өөрийгөө танилцуулаач?

-Би 1982-1986 онд МОНЦАМЭ агентлагт сэтгүүлч, сурвалжлагч, орчуулагчаар ажиллаж байсан. Дараа нь Монголын сэтгүүлчдийн холбоонд, 1988 оноос Нэгдсэн үндэсний байгууллагын Монгол дахь Суурин төлөөлөгчийн газар мэдээллийн ажилтнаар ажилласан. Сүүлийн 10 гаруй жил англи хэлний сургалт, сурах бичиг боловсруулах судалгаан дээр төвлөрч ажиллаж байна. Тухайлбал, 2006 оноос хойш өөрийн зохиосон англи хэлний сурах бичгээ зургаан удаа хэвлүүлж, уншигч, суралцагчдын гарт хүргэсэн. Мөн “Oxford” клуб англи хэлний сургалтын төвөө байгуулсан. Одоо манай “Oxford” клуб Санхүү эдийн засгийн их сургууль дээр байрлаж байгаа.

“50-тын хүрд” сурах бичгийнхээ талаар мэдээлэл өгөөч?

-Системийн аргачлал гэж ойлгож болно. Англи хэлний өнгөрсөн, одоо, ирээдүй буюу 26 цагийг монгол хэл рүү хөрвүүлбэл 50 цаг болдог. Эдгээр 50 цагийг нэг хүснэгтэд багтаасан учир энэ аргаар англи хэл сурч буй суралцагч дүрмээ тоо бодож байгаа юм шиг л сурна. Тиймээс энэ сургалтын арга барил сурах бичгээ “50-тын хүрд” гэж нэрлэсэн. Манай “Oxford” клуб суралцагчаа дүгнэхдээ нэг өгүүлбэрийг дөрвөн цагт хувиргавал нэгдүгээр түвшин, 10 хувиргавал хоёрдугаар түвшин, 20 хувиргавал гуравдугаар түвшинг мэдсэн гэж үзээд тухайн түвшний сертификатыг олгож байгаа. Гуравдугаар түвшинд хүрсэн суралцагч хэрэглээний англи хэл бүрэн эзэмшсэн гэж хэлж болно. Үүнээс илүү түвшний хэлээ англичууд өөрсдөө ч өдөр тутмын яриандаа ашигладаггүй.

-Та нийт хэчнээн шавьтай болсон бэ. Танай сургалтад хамрагдсан, сурах бичгийг үзсэн хүн англи хэлийг хэдий хугацаанд эзэмших вэ?

-Хэл сурна гэдэг өөрийгөө зовоож шаналгаж, хүчлэх зүйл биш. Харин хүүхэд яаж хэлд ордог түүн шиг хялбар аргаар, хурдан хугацаанд сурах боломжтой. Манай сургалтын нэг ангид 5-10 гаруй суралцагч хамрагддаг. Нийт 300 гаруй хүнд хичээл заасан. 2010 онд надаар хичээл заалгасан ШУТИС-ийн багш Оюунбилэг 20 жил толгой эргэсэн зүйлийг хоёр хоногт ойлгож авлаа гэсэн. Суралцах хугацааны хувьд сурах бичигт зааснаар хичээлээ үзвэл 10 хоногт бүх дүрмээ мэдээд авчихна. Ярианы сурах бичгээ сайтар ашиглаж, бүх ярианы өгүүлбэрийг цээжилж чадвал нэг сарын дотор англи хэлний суурь дүрмийг  гүйцэд сайн эзэмших боломж бий.