Монгол Улс, АНУ-ын ГХЯ хоорондын консулын анхдугаар зөвлөлдөх уулзалт 2019 оны дөрөвдүгээр сарын 25-ны өдөр Вашингтон хотноо боллоо. Монголын талын төлөөлөгчдийг ГХЯ-ны Консулын газрын захирал Л.Мөнхтүшиг, америкийн талын төлөөлөгчдийг АНУ-ын Төрийн Департаментын Туслах төрийн нарийн бичгийн дарга Эдвард Ж. Рамотовски нар тус тус тэргүүлсэн бөгөөд Монгол Улсаас АНУ-д суугаа ЭСЯ, Сан Франциско дахь ЕКГ болон Нью-Йорк дахь БТГ-ын төлөөлөл оролцов.

Консулын энэ удаагийн зөвлөлдөх уулзалт нь Монгол, АНУ-ын хооронд консулын асуудлаар тусгайлан санал солилцох бие даасан сувгийг нээсэн гэдгээрээ онцлог бөгөөд зөвлөлдөх уулзалтын үеэр талууд хоёр талын консулын харилцаа, хамтын ажиллагааны талаар санал солилцож, Улаанбаатар дахь АНУ-ын ЭСЯ, ГХЯ-ны хамтран хэрэгжүүлж буй “Хариуцлагатай аялцгаая” аян олон нийтэд хүрч, тодорхой үр дүнд хүрч буйг сайшаав.

Мөн энэ удаагийн уулзалтаар Монгол Улс АНУ-ын Н2 визийн хөтөлбөрт 2019 онд үргэлжлүүлэн хамрагдаж байгаатай холбогдуулан цаашид монгол иргэдийг өргөнөөр хамруулах боломжийг эрэлхийлэхээр тогтсоноос гадна Монгол Улс алсдаа АНУ-ын визээс чөлөөлөх хөтөлбөрт хамрагдах шалгуур үзүүлэлтүүдийг хангах зорилт тавин шат дараатай арга хэмжээ авч байгааг АНУ-ын талд мөн мэдэгдсэн болно.