С.Зориг агсныг хөнөөсөн гэх хэрэгт буруутгагдаж хорих ял эдэлж буй Б.Содномдаржаа, Т.Чимгээ нарыг эрүүдэн шүүсэн гэх хэргийг өнгөрсөн дөрөвдүгээр сард харьяаллыг нь өөрчилж, Авлигатай тэмцэх газраас Цагдаагийн ерөнхий газрын Тусгай субъектийн хэлтэст шилжүүлсэн. Тэгвэл Б.Содномдаржаа Т.Чимгээ нарыг эрүүдэн шүүсэн гэх хэрэг буюу Нийслэлийн прокурорын газраас Эрүүгийн хуулийн тусгай ангийн 251 дүгээр зүйлийн 251.1, 133 дугаар зүйлийн 133.1-д зааснаар тус тус яллах дүгнэлт үйлдэж, ирүүлсэн нэр бүхий есөн холбогдогчтой эрүүгийн хэргийг Төв аймаг дахь эрүүгийн хэргийн анхан шатны шүүх өнөөдөр хүлээн авсан байна.