Өнгөрсөн сарын 19-нд Азийн триатлоны холбооны конгресс БНСУ-ын Гёнжүд хуралдсан. Энэ үеэр Монголын триатлоны холбооны ерөнхий нарийн бичгийн дарга Б.Цагаанбаатар тус холбооны Техникийн хорооны гишүүнээр /долоон гишүүнтэй/ хоёр дахь удаагаа сонгогдсон байна. Түүнчлэн Техникийн хорооны гишүүдийн анхдугаар хурал өнгөрсөн сарын 22-нд Гёнжүд болж, Б.Цагаанбаатарыг тус хорооны даргаар томилуулах саналыг дэмжиж, Азийн триатлоны холбоо /ASTC/-ны ерөнхийлөгчийн тушаалаар Техникийн хорооны дарга, ASTC-гийн Удирдах зөвлөлийн гишүүнээр дөрвөн жилийн хугацаатай томилжээ.

Азийн триатлоны холбооны Техникийн хороо нь Ази тивд болох триатлон, дуатлон, акуатлоны тэмцээний явцад техникийн дүрмийг хэрэгжүүлж, тэмцээний хуваарийг баталж, шүүгчдийн томилгоог хариуцаж ажилладаг.

Дашрамд дуулгахад, Б.Цагаанбаатар 2009 оноос триатлоны олон улсын шүүгч болж, 2012 онд олон улсын II зэрэг биелүүлсэн. 2013 оны ДАШТ /Лондон/, 2014, 2018 оны Азийн наадам, 2010, 2014 оны Азийн элсний спортын наадамд тус тус шүүгчээр ажилласан юм. Азийн цомын тэмцээнд таван удаа ерөнхий шүүгчээр, хоёр удаа ерөнхий шүүгчийн орлогчоор томилогдон ажилласан туршлагатай юм. Тэрбээр 2004 онд Монголын триатлоны холбоог үүсгэн байгуулж, өнөөг хүртэл ерөнхий нарийн бичгийн даргын албыг хашиж байна.