Францад сургуулийн багш Самюэль Патиг радикал исламист хөнөөсөн хэргээр долоон хүн өнөөдөр шүүгдэх гэж байна. Шүүхийн эх сурвалжийн “Эй-Эф-Пи” агентлагт өгсөн мэдээллээс үзэхэд, энэ хэрэгт яллагдагчаар саатуулагдсан долоон хүний хоёр нь насанд хүрээгүй хүн гэнэ. Тэднийг алан хядагчид багшийнхаа тухай мэдээллийг мөнгөөр олж өгсөн хэрэгт буруутгаж байна. Мөн алан хядагчийн эцэг нь Пати багшийг идэвхтэй шүүмжилдэг байсан, исламын идэвхтэн Абдельхаким Сефриуи, халдлага үйлдсэн этгээдийг зэвсэг худалдан авахад нь дагалдан явсан гурван найзыг нь шүүх гэж байна.

Энэ хэргээр саатуулагдсан бусад хүнийг суллажээ. Францын цагдаагийн газраас өмнө нь энэ хэрэгтэй холбогдуулан 16 хүнийг саатуулсан, үүнээс зургааг нь мягмар гарагийн орой сулласан гэж мэдэгдсэн юм.

Эргэн сануулахад, Францын Конфлан-Сент-Онорин хотод энэ сарын 16-ны орой түүх, газар зүйн багш Самюэль Патиг сургуулийнх нь ойролцоо хөнөөсөн хэрэг гарсан. Гэмт этгээд хэргийн газарт ирсэн цагдаа нарыг сүрдүүлсэн боловч хүчнийхэн түүнийг устгасан байна. Энэ хэргийг Францын алан хядах ажиллагаатай тэмцэх прокурорын газарт шалгах үүрэг даалгавар өгсөн юм. Францын төрийн тэргүүн Эммануэль Макрон энэ хэргийг алан хядах ажиллагаа гэж нэрлэсэн байна.