ОХУ-ын сөрөг хүчний удирдагчдын нэг гэгддэг Алексей Навальныйг дэмжигчдийн жагсаал цуглааныг энэ сарын 21-ний өдөр зарлаж байгаагаа түүний үүсгэн байгуулсан Авлигатай тэмцэх сангийн удирдлагууд мэдэгдсэн. Тэгвэл ОХУ-ын Дотоод хэргийн яамнаас иргэддээ хандаж коронавирусний халдвар, гарч болзошгүй үймээнээс сэргийлж хууль бус жагсаал цуглаанд оролцохгүй байхыг уриалсан байна.

Мөн ийм жагсаал цуглаанд өсвөр настнуудыг оролцохоос сэргийлэхийг уриаллаа. Түүнчлэн ОХУ-ын Ерөнхийлөгчийн Хэвлэлийн нарийн бичгийн дарга Дмитрий Песков энэ уриалгатай холбоотойгоор байр сууриа илэрхийлжээ.

Тэрбээр "Эрх баригчдаас зөвшөөрөл авалгүйгээр ийм жагсаал цуглаан зохион байгуулбал автоматаар хууль бус гэж үзэж, хууль сахиулах байгууллагынхан ОХУ-ын хууль тогтоомжийн дагуу л хариу арга хэмжээ авах болно. Мөн ийм өдөөн хатгасан уриалгууд ОХУ-ын нутаг дэвсгэрийн гаднаас их сонсогдож байгааг сануулах нь чухал байна. Хилийн чанадад амьдардаг зарим иргэн ийм уриалга гаргаж байна. Үүнийг цаг үргэлж санаж байх ёстой" гэсэн юм.

Владимир мужийн шоронд хоригдож байгаа Алексей Навальныйг мужийн хорих эмнэлэг рүү шилжүүлсэн тухай Холбооны шүүхийн шийдвэр гүйцэтгэх албаны Владимир дахь салбараас мэдээлсэн байна.