Оросын талаас байгалийн хийн төлбөрийн шинэ нөхцөл тавьсантай холбогдуулан Итали улс ЕХ-ны байр суурийг хүлээж харзнасан байдалтай байна. Хийн төлбөрийг рублиэр төлөх нь Оросын эсрэг хоригийг зөрчсөн хэрэг болно гэж Европын холбоо дүгнэх нөхцөлд Итали улс гагцхүү дээрх болзлоос татгалзана гэсэн тухай “Блумберг” агентлаг Италийн засгийн газрын эх сурвалжаас иш татан мэдээллээ.

“Брюсселийн зүгээс хууль эрх зүйн дүн шинжилгээ бүрэн гарч дуустал, Италийн засгийн газар энэ чиглэлд аливаа үйл ажиллагаа явуулахгүй” гэж мэдээлэлд дурдсан байна. Европын комисс өмнө нь, Оросын ерөнхийлөгч Владимир Путины тогтоолд хийсэн дүн шинжилгээгээ Европын холбооны орнуудад танилцуулж байсан.

Тэнд дурдснаар, төлбөрийн шинэ механизмд шилжих нь оросын засгийн газар, Төв банк болон бусад байгууллага, хувь хүмүүсийн эсрэг авч хэрэгжүүлж байгаа хориг арга хэмжээг зөрчих магадлалтай гэж дүгнэжээ.

Тухайлбал, хийн хэлцэл дуусгавар болох хугацаа болоод худалдан авагч тал үүргээс чөлөөлөгдөх тов зэргийг Оросын төр бүрэн хянаж зохицуулах эрх зүйн шинэ нөхцөл бүрдэхээр байна гэж Европын комисс үзэж байгаа юм байна.