Их Британи улс харилцан туслалцах тухай гэрээг Швед, Финланд улсуудтай байгууллаа. Ингэснээр Британи Швед, Финланд улсуудыг НАТО-д элсэх тухайгаа зарлахаас эхлээд гишүүн болох хүртэлх хугацаанд аюулгүй байдлыг нь хангах үүрэг хүлээж байна.

Гэрээгээр талууд тагнуулын мэдээлэл солилцох үйл ажиллагааг эрчимжүүлэх, цэргийн хамтарсан сургуулилтын давтамжийг нэмэгдүүлэх, кибер халдлагын эсрэг хамтын ажиллагааг өргөжүүлэх гэнэ.

Их Британийн ерөнхий сайд Борис Жонсон Нордикийн хоёр улсад айлчлах үедээ аюулгүй байдлын шинэ гэрээнд тус тус гарын үсэг зуржээ. Британи улс Швед, Финланд улсуудтай батлан хамгаалах хамтын ажиллагааны хүрээнд тус бүс нутагт хуурай замын цэрэг, тэнгисийн цэрэг болон нисэх хүчний бие бүрэлдэхүүнийг байрлуулах санал тавихаар төлөвлөж байгаа аж.

Энэ талаар Финландын Ерөнхийлөгч Саули Ниинистё, “Бидний хувьд НАТО-д элсэх нь хэний ч эсрэг зүйл биш. Бид аюулгүй байдлаа улам баттай болгохын тулд НАТО-д элсэх гэж байгаа юм. Финланд аюулгүй байдлаа илүү сайн хангаж чадлаа ч бусдын аюулгүй байдалд ямар ч аюул учруулахгүй.” хэмээн онцолсон.

Харин Финландын Ерөнхийлөгч Саули Ниинистё, “Энэ гэрээ бол бидний ирээдүйд хийх аюулгүй байдлын бодлогын сонголтоос үл хамааран чухал ач холбогдолтой гэж бодож байна.” хэмээн хэлжээ.

Швед, Финланд улсууд нь цэрэг зэвсгийн тал дээр төвийг сахих бодлоготой, үүнийгээ удаан хугацаанд хадгалж ирсэн. Гэвч ОХУ Украинд цэрэг оруулсан нь төвийг сахисан эдгээр улсуудыг НАТО-гийн хамгаалалт руу хүссэн хүсээгүй түлхэж байна гэж улс төрийн шинжээчид онцолж байна.