Европын холбоо Украиныг Оросын эсрэг ялалтад хүргэхийн тулд хүнд зэвсэг худалдан авахад нь зориулж дахин 500 сая еврогийн тусламж үзүүлэхээр болжээ. Энэ тухай тус холбооны гадаад бодлогын дээд төлөөлөгч 7-гийн бүлгийн уулзалтын үеэр мэдэгджээ.

Нэмж 500 сая еврогийн тусламж өгснөөр Европын холбооноос Украинд үзүүлж байгаа дайны тусламж 2 тэрбум еврод хүрч байна. Европын холбооны энэхүү нэмэлт тусламжийг зөвхөн хүнд зэвсэг худалдан авахад зарцуулах нөхцөлтэй юм байна.

Өмнө нь Европын холбоо 500сая, 450сая гэх зэргээр хэд хэдэн удаагийн зэвсгийн болон санхүүгийн тусламжийг Украинд олгож байсан. Украины төр засаг тусламжаа нэмэгдүүлэхийг Европын холбоонд удаа дараа уриалсан.

Мөн Европын холбоо зарим гишүүн орнууд нь эргэлзэж байгаа ч Оросын газрын тосны эсрэг хориг тавихыг гишүүн улс орнууд нь дэмжинэ гэдэгт найдаж байна. Европын холбооны эрх баригчид Орост газрын тосны хориг тавих асуудлыг ирэх даваа гарагт хэлэлцэх гэж байна.

Одоогоор Оросын газрын тосноос ихээхэн хамааралтай байдаг Унгар улс Европын холбооны хоригийг эсэргүүцэж байгаа юм.