Шууд Chart

УИХ-ын дарга Г.Занданшатар АХБ-ны Зүүн Азийн газрын ерөнхий захирал М.Тереза Хог хүлээн авч уулзлаа

2022-07-02 14:56:14

Монгол Улсын Их Хурлын дарга Г.Занданшатар өчигдөр (2022.07.01) Азийн хөгжлийн банкны Зүүн Азийн газрын ерөнхий захирал, хатагтай М.Тереза Хо тэргүүтэй төлөөлөгчдийг хүлээн авч уулзлаа.

.

Хатагтай М.Тереса Хо УИХ-ын даргыг цаг зав гарган хүлээн авч уулзаж байгаад талархал илэрхийлээд Азийн хөгжлийн банкнаас ойрын ирээдүйд хэрэгжүүлэх хөрөнгө оруулалтын төлөвлөгөө, санхүүжилтийн гэрээ хэлэлцээрийн талаар мэдээлэл өгсөн юм. Тэрбээр, "Азийн хөгжлийн банк нь өнгөрсөн 30 жилийн хугацаанд Монгол Улсын Засгийн газартай хамтран ажиллаж, хөрөнгө оруулалт, зээл тусламжийн төслийг амжилттай хэрэгжүүлж ирсэн. “2022-2023 Санхүүжилтийн ерөнхий хөтөлбөр”-ийг байгуулах ажлын хүрээнд Сангийн яамнаас холбогдох арга хэмжээг авч Засгийн газрын хуралдаанаар хэлэлцүүлж, Улсын Их Хурлаар соёрхон батлуулах ажил үргэлжилж байна. Хоёр талын хамтын ажиллагааны төсөл, хөтөлбөрүүдийг Улсын Их Хурал дэмжиж ажиллана гэдэгт итгэлтэй байна” гэв.

Монгол Улс Азийн хөгжлийн банктай 30 жил хамтран ажиллаж байна. Олон улсын хөгжлийн түншүүд дотроос Азийн хөгжлийн банк бол манай улсын гол түнш юм гэдгийг Улсын Их Хурлын дарга Г.Занданшатар тэмдэглээд хоёр талын хамтын ажиллагааг эрчимжүүлэхэд парламентаас бүхий л талаар дэмжин ажиллахаа илэрхийллээ. Мөн Улсын Их Хурлаас эдийн засгийг сэргээх, хувийн хэвшлийг дэмжих, хүнсний хангамж, аюулгүй байдлыг хангах чиглэлд онцгой анхаарч ажиллаж байгааг дурдаад Азийн хөгжлийн банктай аялал жуулчлал, хүнсний хангамж, аюулгүй байдал, хөдөө аж ахуй, эрчим хүчний салбарын үр дүнтэй хамтын ажиллагааг өргөжүүлэх талаар саналаа илэрхийлсэн.

Уулзалтад Улсын Их Хурлын Аюулгүй байдал, гадаад бодлогын байнгын хорооны дарга Б.Баттөмөр, Азийн хөгжлийн банкны Монгол Улс дахь Суурин төлөөлөгч Павит Рамачандран болон албаны бусад хүмүүс оролцлоо гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.


УИХ-ын дарга Г.Занданшатар АХБ-ны Зүүн Азийн газрын ерөнхий захирал М.Тереза Хог хүлээн авч уулзлаа  
Үзсэн: 117 Mongolian National Broadcaster  

Анхааруулга:

Та одоогоор сэтгэгдэл үлдээх боломжгүй байна.
MNB.mn сайтын редакц
Утас: 70127055

Бидэнтэй нэгдээрэй