Шууд Chart

Өчигдрийн тоглолтын дараа Ази тивийн төлөөлөл бүгд хасагдлаа

2022-12-06 10:58:44

"Катар-2022" хөлбөмбөгийн ДАШТ-ий хасагдах шатны тоглолтууд үргэлжлэн явагдсаар байна. Өчигдрийн байдлаар шөвгийн наймын зургаан багийн нэр тодорхой боллоо. Тухайлбал шилдэг наймд Холланд-Аргентин, Бразил-Хорват, Англи-Франц шалгаран үлдэж хоорондоо тоглох оноолт таарсан.

Өчигдрийн тоглолтын дараа Ази тивийн төлөөлөл бүгд хасагдлаа.

Япон-Хорват 1:1 (1:0,0:1,0:0,0:0) (торгуулийн цохилтоор 1:3)

"Хөх самурай" тоглолтын эхнээс идэвхтэй, эрмэлзлэлтэй довтолж байсны "шанд" зүй ёсоор эхний гоолыг оруулсан. 43 дахь минутад булангийн цохилтыг шууд гүйцэтгэлгүй , бэлдсэн хувилбар хийж Маэда бужигнаан дундаас тун чухал гоолыг хийв.

Завсарласны дараа Хорват бас л төстэй гоолыг Ловрений дамжуулалтаар Перисич буланд ёстой ганган мөргөн тоог тэнцүүлэв. Үндсэн цаг (90 мин), нэмэлт цагт (15+15) тоо өөрчлөгдсөнгүй ялагчийг 11 метрийн торгуулийн цохилтоор тодруулах боллоо.

Торгуулийн цохилт бол сэтгэл зүй тулаан байдаг. Аз од ч байдаг. Бас авьяас ур чадвар ч байдаг. Энэ удаа Хорватын хаалгач Ливакович яах аргагүй сайн байлаа. Тэрбээр Японы багийн 3 " пенальти"-г хаалаа.

ДАШТ-ий түүхэнд торгуулийн цуврал цохилтод  гурван 11м хаасан гурав дахь хаалгач нь Ливакович боллоо. Үүнээс өмнө Португалийн Рикардо 2006 онд Английн эсрэг, Хорватын Субашич 2018 онд Данийн эсрэг гурван пенальти хааж байсан ажээ.

Бразил-БНСУ 4:1

Бразил хожих нь бараг тодорхой байсан БНСУ-ыг ийм хурдан "буугаад өгнө" гэж хэн ч бодоогүй биз.

Неймар гэмтлээс эргэн ирсэн нь Бразилийн багийн уур амьсгалд ихээхэн нөлөөлсөн нь тоглолтоос нь харагдаж байв. Винисиус Жуниор, Неймар, Ришарлисон , Лукас Пакета нар ёстой л самбагаа бүжиглэн эхний үед асуудлыг шийдчихлээ.

Хоёрдугаар үед Солонгосчууд нэр төрийн гоол орууллаа.

Бразил -Хорват хоёр баг хоорондоо 1/4 -д учраа таарсан.

12-р сарын 6

Марокко – Испани

Португал – Швейцар

Ц.Энхтүвшин


Өчигдрийн тоглолтын дараа Ази тивийн төлөөлөл бүгд хасагдлаа  
Үзсэн: 157 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү

Бидэнтэй нэгдээрэй