АНУ-ын ТНБД Энтони Блинкен Энэтхэгт 20-ийн бүлгийн гадаад хэргийн сайд нарын уулзалтад очих замдаа Төв Азийн орнуудад айлчилж байна. Тэрээр гадаад бодлогодоо уян хатан ханддаг хуучин Зөвлөлтийн бүрэлдэхүүнд байсан Төв Азийн 5+ нь Америк гэсэн форматын жил тутмын уулзалтын хүрээнд Казахтанд уулзаж, худалдааны замыг өргөжүүлэх, хувийн хэвшлийг дэмжих зорилгоор 25 сая америк долларын тусламж үзүүлэхээ амласан байна. Блинкений энэ айлчлал Орос нөлөөгөө хадгалж, Хятадын нөлөө нэмэгдэж байгаа Төв Азид АНУ илүү найдвартай түнш болохоо харуулахад чиглэсэн гэж ажиглагчид үзэж байна.

Төв Азийн 5 улс өнгөрсөн 7 хоногт НҮБ-ын ерөнхий ассамблейд болсон Оросыг зэмлэн буруутгах тухай тогтоолд бүгд санал өгөхөөс түдгэлзсэн юм. Үүний дараахан Блинкен Төв Азид ирсэн нь Оросын энэ дайн тэдний аюулгүй байдалд заналхийлж байгааг ойлгуулах зорилготой гэж Өрнөдийн хэвлэлд мэдээлжээ.

Блинкен Байдены засаг захиргаанаас Төв Азид айлчилж байгаа анхны өндөр албан тушаалтан болж байна. Тэрээр Төв азийн орнууд нийтлэг сорилтуудыг шийдвэрлэх, өөрсдийн ирээдүйг тодорхойлоход хамтран ажиллахдаа хамгийн хүчтэй байдаг, Вашингтон тэдний тууштай түнш байхыг эрмэлздэг гэж АНУ-ын энэ бүсэд баримталдаг бодлогыг илэрхийлжээ. Вашингтон 1990-ээд оноос хойш Төв Азийн орнуудыг Москвагийн нөлөөллөөс гаргах оролдлого хийж байсан ч төдийлөн амжилт олоогүй.

Узбекстан, Тажикстан улсууд Афганистанд 20 жил үргэлжилсэн дайны үед Америкт ложистикийн туслалцаа үзүүлж байсан ч Оростой харилцаа холбоо нь гүнзгий хэвээрээ байгаа төдийгүй ТУХН-ийн гишүүдийн хувьд эдийн засаг, цэрэг арми, дипломатын салбарт өргөжин тэлж байна. Казахстан бол Орос болон хуучин зөвлөлтийн бүрэлдэхүүнд байсан орнуудаас бүрддэг Хамтын аюулгүй байдлын гэрээний байгууллагын гишүүн. Гэхдээ Казахстаны төр Оросын хүчээр эзэлсэн Украины газар нутгийг хүлээн зөвшөөрөхөөс татгалзаж байгаа. Казахстаны гадаад хэргийн сайд ч Астана бол Орос, Украины аль алинтай нь түүхэн харилцаатай.

Бидний эдийн засаг урт хугацааны турш харилцан уялдаатай байж ирсэн. Иймээс манай улс ОХУ хориг арга хэмжээнээс зайлсхийх аливаа боломжоос зайлсхийхийг чармайж байгаа гэдгийг онцолжээ. Харин Блинкен Оросыг дайн хийхийг дэмжсэн эсвэл хоригийг зөрчсөн ямар ч компанийг ямар ч эргэлзээгүйгээр хоригт оруулна гэж мэдэгдсэн байна. Блинкены айлчлал өнөөдөр Узбекстанд үргэлжилж байна.