Долоогийн бүлгийн Гадаад хэргийн сайд нарын уулзалт өнөөдөр Японы Нагано мужийн Кариузава хотод эхэлнэ. Бүлгийг даргалагч орны хувиар Япон улс, ирэх тавдугаар сард Хирошимад болох Долоогийн бүлгийн дээд хэмжээний уулзалтын өмнө бүлгийнхээ нэгдмэл байдлыг дэлхий дахинд батлан харуулахыг зорьж байна.

Японы Гадаад хэргийн сайд Хаяаши Ёшимаса, АНУ-ын төрийн нарийн бичгийн дарга Энтони Блинкен нар өнөөдөр үдээс хойш Токиогоос уулзалт болох газарт очих юм байна. Гурван өдөр үргэлжлэх уулзалт яриа хэлэлцээний эхний 2 өдөр Украины байдал, Хятад болон Энэтхэг Номхон далайн бусад улс, Африкийн асуудлыг зонхилох хэлэлцэх төлөвтэй байна. Харин гурав дахь өдөр нь, цөмийн зэвсэг хураах болон энэ төрлийн зэвсгийг үл дэлгэрүүлэх асуудлыг хэлэлцэхээр товложээ. Уулзалтын төгсгөлд сайд нар хамтарсан мэдэгдэл батална.

Энэ хамтарсан мэдэгдлийн төсөлд Оросын цэргийг Украинаас нэн даруй гаргахыг шаардсан шаардлага багтсан. Мөн Хятад улсыг одоогийн статус-квот-г хүч хэрэглэх юм уу албадан өөрчлөх аливаа алхам хийх оролдлого хийхгүй байх уриалга мөн багтсан гэж мэдээлж байна. Тэрчлэн Японы засгийн газар “Өмнөд дэлхий” гэгддэг шинэ тутам хөгжиж байгаа орнуудад тусламж үзүүлэх асуудлыг энэ баримт бичигт мөн оруулах бодолтой байна. Японы гадаад хэргийн сайд Хаяаши яриа хэлэлцээний босгон дээр, Украин дахь Оросын түрэмгийллийн улмаас  олон улсын хамтын нийгэмлэг түүхэн эргэлтийн цэгт ирээд байгааг мэдэгдэж байсан юм. Хятад улс Тайваний ойр орчимд томоохон цэргийн сургуулилалт явуулсны дээр, өнөөдрөөс эхлэн арлын хойд бүсэд Бээжин нислэгийн хаалттай бүс үүсгэж байгаа нөхцөлд энэ уулзалт ажлаа эхэлж байна.

Өнгөрөгч пүрэв гарагт Умард Солонгос хатуу түлшээр ажилладаг тив хоорондын шинэ төрлийн баллистик пуужин туршсанаа зарласан нь бүс нутагт түгшүүр дагуулсан олон удаагийн пуужингийн туршилтын сүүлийнх нь болоод байгаа. Уулзалтыг даргалагч орны хувиар Токио энэ бүс нутгийн асуудлуудыг анхаарлын төвд байлгахыг чармайхын хамт, Украин дахь Оросын түрэмгийлэл Азийг сонор сэрэмжээ нэмэгдүүлэх зайлшгүй нөхцөл болж байгааг онцолж байна. Засгийн газар нь саявтар батлан хамгаалах бодлогоо эргэн харж, энэ талын зардлаа эрс өсгөсөн Ерөнхий сайд Кишида “Өнөөдрийн Украин маргаашийн Зүүн Ази байж болзошгүй” гэдгийг нэг бус удаа сэрэмжлүүлж байгаа юм.