Японы засгийн газар олон талын хяналт шалгалт хийсний дүнд Өмнөд Солонгос улсыг хөнгөлөлттэй нөхцөлөөр худалдаа хийдэг орнуудын жагсаалтдаа буцаан оруулахаар шийдвэрлэлээ гэдгээ өчигдөр зарлажээ. Өмнөд Солонгос импортын зарим бараа бүтээгдэхүүн Умард Солонгос зэрэг улс орнууд руу дамжин гарахаас урьдчилан сэргийлэх арга хэмжээ авч байгааг Японы засгийн газраас сайшаасан байна. Өмнөд Солонгосын засгийн газар Японы улсыг мөн адил жагсаалтдаа эргүүлж оруулж байгаагаа өнгөрсөн 7 хоногт зарласан. Ингээд Япон улсыг ч мөн адил алхам хийхийг уриалсан юм. Өнгөрсөн 3-р сард Өмнөд Солонгосын ерөнхийлөгч Японд айлчилж, харилцаагаа сайжруулахаар дээд түвшиндөө тохирсон. Юн Сок Ёл, Фумио Кишида нарын дээд хэмжээний уулзалтын үр дүн олон жил маргаантай байж ирсэн худалдааны салбарт саад бартааг арилгах, харилцааг сэргээх зэргээр илэрч байгааг шинжээчид тэмдэглэжээ. 2018 онд Өмнөд Солонгосын шүүхээс дайны үед иргэдийг нь хөдөлмөрийн мөлжлөгт оруулж байсан үндэслэлээр Японы нэр бүхий компаниудаар нөхөн төлбөр төлүүлэх шийдвэр гаргаснаас хойш хоёр орны харилцаа муудаж, улмаар Сөүл, Токио хоёр 2019 онд хөнгөлөлттэй нөхцөлөөр худалдаа хийдэг түншүүд байхаа больсон. 2019 оны дүнгээр далайгаар зааглагддаг хөрш Өмнөд Солонгос нь Японы худалдааны гурав дахь том түнш нь болсон. 2018 онд худалдааны эргэлт нь 9,3 их наяд иенд хүрсэн байна.