Шууд Chart

ГССҮТ ХУД-ийн Эрүүл мэндийн төвтэй хамтран ажиллана

2024-02-21 16:48:21

Гэмтэл согог судлалын үндэсний төвийн захирал Э.Галбадрах, Хан-Уул дүүргийн Эрүүл мэндийн төвийн дарга Э.Бодьцэцэг нар дүүргийн хүн амд үзүүлэх гэмтэл согогийн тусламж үйлчилгээг өргөжүүлэх, нийгмийн эрүүл мэндийн чиглэлээр хамтарч ажиллах санамж бичигт гарын үсэг зурлаа.

Санамж бичгийн хүрээнд тус дүүргийн иргэдэд үзүүлж буй гэмтэл согогийн тусламж үйлчилгээний нэр төрлийг нэмэгдүүлэх, эмч мэргэжилтнүүдийг ажлын байран дээр нь сургаж чадавхижуулах, хамтарсан үзлэг оношлогоог зохион байгуулах болон осол, гэмтлээс урьдчилан сэргийлэх мэдлэг хандлагыг дээшлүүлэх зэрэг үйл ажиллагааг хамтран явуулахаар төлөвлөсөн байна.

Түүнчлэн телемедицин буюу цахим зөвлөн туслах үйлчилгээгээр дамжуулан гэмтлийн шалтгаантай болон биеийн байдал хүнд үйлчлүүлэгчдэд яаралтай тусламж үйлчилгээ үзүүлэх, ГССҮТ-ийн нарийн мэргэжлийн эмч нарыг тодорхой хуваарийн дагуу ХУД-ийн Эрүүл мэндийн төвд ажиллуулах юм.

Хамтын ажиллагааны дагуу тус дүүргийн Эрүүл мэндийн төв, Өрхийн эрүүл мэндийн төвүүдийн эмч мэргэжилтнүүдэд ГССҮТ-ийн Толгойн мэс заслын тасгаас “Гавал тархины гэмтэлтэй өвчтөнг үзэж, оношлох” сургалтыг зохион байгууллаа.

ГССҮТ-өөс орон нутаг төдийгүй нийслэлийн хүн амд гэмтэл согогийн тусламж үйлчилгээг түргэн шуурхай, чанартай, хүртээмжтэй үзүүлэх, эмчилгээнд нэвтрүүлсэн шинэ арга туршлагыг нутагшуулах чиглэлээр үйл ажиллагаа явуулж байгаа билээ.

Тиймээс энэхүү үйл ажиллагаа нь нийслэлийн хүн амд гэмтэл согогийн тусламж үйлчилгээг ойртуулах, чанар хүртээмжийг нэмэгдүүлэх, лавлагаа шатлалын төвийн ачаалал төвлөрлийг бууруулах зэрэг олон талын ач холбогдолтой ажил болж байна.

Нийтэлсэн: Эрүүл мэндийн яам

ГССҮТ ХУД-ийн Эрүүл мэндийн төвтэй хамтран ажиллана  
Үзсэн: 919 Mongolian National Broadcaster  

Сэтгэгдэл бичих:

АНХААРУУЛГА: Уншигчдын бичсэн сэтгэгдэлд MNB.mn хариуцлага хүлээхгүй болно. ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй. Сэтгэгдэлтэй холбоотой санал гомдолыг 70127055 утсаар хүлээн авна.
1000 Сэтгэгдэлээ бичнэ үү
Зочин [127.0.0.xxx] 2024-02-22 20:21
Hamgiin sain duurgiin emneleg shuu han uul
Зочин [127.0.0.xxx] 2024-02-22 14:18
Хамтын ажиллагаанд амжилт хүсье

Бидэнтэй нэгдээрэй