Сэлэнгэ аймгийн Мандал сум дахь Гацууртын ордод гар аргаар алт олборлогчийн тоо сүүлийн хоёр сарын хугацаанд нэмэгдэж 600-д хүрсэн байгаа юм. Ноён уулаас 3-5 км-ийн зайд байх “Сентерра гоулд монголиа” компанийн эзэмшдэг талбайд энэ хүмүүс хууль бусаар алт олборлодог аж. Гар аргаар алт олборлогсод голдуу шөнийн цагаар ажилладаг байна. Эдгээр хүмүүсийн тал хувь нь Сэлэнгэ аймгийнх бол үлдсэн нь бусад орон нутгаас ирсэн гэнэ.

 

 

Мандал сумын Тамгын газар болон Байгаль орчны газар Цагдаагийн хэлтсийнхэн Гацууртын ордын олборлолтын бүсэд зөрчил гаргасан хүмүүсийн 600 гаруй тээврийн хэрэгслийг журамласан байна. Мөн Мандал сумын Байгаль орчны газар сумын Онцгой байдлын газартай хамтран гар аргаар алт олборлогсдын ухсан нүхийг булж, нөхөн сэргээлтийн ажил хийсэн байна. Хэдийгээр аймаг, сумаас шат дараатай арга хэмжээ авч байгаа ч хууль бусаар алт олборлогсод ихсэж, байгаль орчинд сөргөөр нөлөөлөх үйл ажиллагаа явуулсаар байна гэдгийг Мандал сумын Байгаль орчны улсын хяналтын байцаагч хэлж байсан юм.

 

 

50 тонн алтны нөөцтэй Гацууртын ордыг УИХ-аас стратегийн орд газрын жагсаалтад оруулсан. Гэхдээ чухам хэдэн хувийг нь стратегийн орд газарт авах тухай эцсийн байдлаар нарийвчилсан журам гаргаж шийдээгүйгээс лиценз эзэмшигч компани олбололтын ямар нэг үйл ажиллагаа явуулаагүй, хүлээлттэй байгаа юм байна. Байгаль орчныг хараа хяналтгүй ингэж сүйдэлж байхаар эдийн засаг хүнд үед хууль ёсны олборлолтыг нь явуулж, татвар шимтгэлээр төсөвтөө мөнгө оруулахыг орон нутгийнхан хүсч байна. Албан ёсны олборлолт явуулаад эхэлбэл ядаж л нөхөн сэргээлт нь буух эзэн, буцах хаягтай болох юм.

 

 

 Энэ талаарх дэлгэрэнгүй мэдээллийг "Монголын мэдээ" сувгийн мэдээллийн хөтөлбөрөөс үзээрэй.