Монгол орны мөнх цэвдгийн судалгааны зураглалыг 1974 онд анх хийж, хэвлүүлж байсан. Тэгвэл 42 жилийн дараа цэвдгийн судалгааг дахин боловсруулж, шинэ зураглалыг бэлэн болголоо. Судалгаанаас харахад тухайн үед Монгол орны нутаг дэвсгэрийн 65 орчим хувьд тархаж байсан мөнх цэвдгийн талбай 29 хувь хүртэл буурсан үзүүлэлттэй гарчээ.

Хээрийн судалгааны багийнхан 1971 онд өрөмдлөг хийж, судалгаа явуулсан яг тэр хэсгүүдэд шинээр өрөм тавьж цэвдгийн өөрчлөлтийг хэмжсэн байна. Монгол орны баруун, төв, зүүн бүсийн 32 цэгт өрөмдлөг хийж судлахад цэвдэг нь хатаж, байгаль орчны доройтол үүссэн нутаг цөөнгүй тохиолдсон болохыг Газарзүй, гео экологийн хүрээлэнгийн цэвдэг судлалын салбарын эрдэм шинжилгээний ажилтан Я.Гансүх хэллээ. 

Цэвдгийн хэмжээ буурах гол шалтгаан нь дэлхийн дулаарал, уур амьсгалын өөрчлөлт юм. Монгол орны цэвдгийн талбай хумигдахад газрын гадаргын ургамлан бүрхэвчийн хомсдол, ойн түймэр, хүний буруутай үйл ажиллагаа зэрэг олон хүчин зүйл нөлөөлсөн байна. Үүнийг бууруулах боломж нь байгаль экологид ээлтэй, тогтвортой хөгжлийг хангах юм.

1:1.000000 масштабтай шинэ боловсруулсан цэвдгийн зураглалд түшиглэн барилга аж үйлдвэрийн салбарууд байгаль экологид ээлтэй уялдаатай байдлаар хөгжих боломжийг бүрдүүлнэ. Өөрөөр хэлбэл, цэвдгийн зураглалд үндэслэн байгаль экологийн өөрчлөлттэй нутаг дэвсгэрүүдийг тогтоох, судлах, шинэ бүтээн байгуулалтын төлөвлөгөөгөө боловсруулах зэргээр ашиглана гэсэн үг. Монгол орны нутаг дэвсгэрт эзлэх цэвдгийн талбайн хэмжээ бараг 50 хувь хумигдсан. Гэвч энэ нь цэвдгийн хэмжээ 50 хувь буурсан гэсэн үг биш гэдгийг судлаачид онцолж байлаа.