Манай улс жимс жимсгэний хэрэгцээнийхээ 90 гаруй хувийг импортоор хангадаг. Импортын жимс, жимсгэнийг хилээр нэвтрүүлэхдээ эхлээд бичиг баримтын хяналт шалгалт, биет үзлэг, лабораторийн шинжилгээ зэргийг хийдэг байна. Эдгээр шалгалтаар зөрчил илрээгүй тохиолдолд улсын хилээр нэвтрүүлдгийг холбогдох байгууллагаас мэдээллээ.

Гарал үүслийн гэрчилгээнээс эхлээд ямар нэгэн зөрчил илэрсэн тохиолдолд тухайн жимсийг хил дээрээс буцаадаг. Манай байцаагч нар өдөр болгон худалдааны төв, захуудаар хяналт шалгалтаа хийж байгаа. Өнөөдрийн байдлаар импортын жимсэнд хүний биед хортой химийн бодис илэрсэн тохиолдол гараагүй гэж НМХГ-ын Экспорт, импортын хилийн хорио цээрийн хяналтын хэлтсийн Ургамлын хорио цээрийн хяналтын улсын ахлах байцаагч н.Алтанцэцэг мэдээлж байна.

Харин зориулалтын тээврийн хэрэгслээр ном журмынх нь дагуу орж ирсэн жимс жимсгэнэ хэрэглэгчийн гар дээр очихдоо олон гар дамждаг учраас нянгийн бохирдол ихтэй болсон байдаг гэж МХГ-аас мэдээлж байна. Хэрэв таны худалдаж авсан жимс муудсан, хортон шавьжтай, хүнсэнд хэрэглэж болмооргүй санагдвал МХГ-т хандан шинжилгээнд хамруулж болох юм.