Ерөн жилийн түүхтэй “Өргөө” амаржих газар өнөөдөр НИТХ-ын даргын тушаалаар нийслэлийн дээд шагнал болох “Хангарди” одонгоор шагнуулав. Нийслэлийн Өргөө амаржих газрын дарга, Анагаах ухааны доктор Г.Баясгалан “Өнөөдөр манай байгууллага эх үрсийн баяраа “Айл бүрт аз жаргал бэлэглсэн 90 жил” нэрийн дор тэмдэглэж байна.

Энэ баяр дээр минь баяр нэмж манай байгууллагын 480 гаруй ажилчдын хөдөлмөрийг өндөрөөр үнэлж Өргөө амаржих газрыг төрийн дээд шагнал “Хөдөлмөрийн гавъяаны улаан тугийн одон”-гоор шагналаа. Мөн нийслэлийн дээд шагнал “Хангарди” одонгоор давхар шагнуулаад байна. Өргөө амаржих газарт нийслэлийн хүн амын гурван хүн тутмын нэг, улсыг хүн амын долоон хүн тутмын нэг нь төрдөг. 90 жилийн хугацаанд 375 мянга гаруй эх амаржсан байдаг. Энэ их хөдөлмөрийг өндрөөр үнэлсэнд нийт ажилчдынхаа өмнөөс гүн талархал илэрхийлье” хэмээв.

“Айл бүрт аз жаргал бэлэглэсэн 90 жил” баярын үйл ажиллагаанд үе үеийн ахмад эмч, ажилчид, Монгол Улсын Хөдөлмөрийн баатар Н.Түвшинбаяр, Монгол Улсын Хөдөлмөрийн баатар, Сумогийн их аварга М.Даваажаргал нар оролцож, хүрэлцэн ирсэн хүүхэд багачуудад гарын бэлгээ гардуулан өгөв.