Хүчит бөхийн барилдааныг Улсын Их Хурлын дэд дарга, Үндсэн хуулийн өдрийг тэмдэглэн өнгөрүүлэх комиссын дарга Р.Гончигдорж нээж товч үг хэлсэн юм. Тэрээр ”Улс орноо гэсэн Монгол Улсын иргэн та бид өнгөрсөн 22 жилийн хугацаанд Үндсэн хуулиа мөрдөн сахиж, түүний хүрээнд хэрэгжүүлж, иргэний ардчилсан нийгмээ цогцлоон бүтээхийн төлөө хамтдаа байж, богино хугацаанд улс төр, эдийн засаг, нийгмийн хүрээнд чамгүй амжилтыг оллоо. Ард түмнийхээ хүсэл зориг, сонголтыг баталгаажуулсан үндсэн хуулийг боловсруулж баталсан УБХ-ын гишүүд, АИХ-ын депутат та бүхэнд УИХ-ын нэрийн өмнөөс гүн талархал илэрхийлье” гэлээ.

 

 

  Бөхийн барилдааны нээлтийн ажиллагаанд УИХ-ын гишүүн, Соёл, спорт, аялал жуулчлалын сайд Ц.Оюунгэрэл, УИХ-ын гишүүн,  дархан аварга  Б.Бат-Эрдэнэ, Үндсэн хуулийн цэцийн дарга Ж.Амарсанаа, УИХ-ын Тамгын газрын Ерөнхий нарийн бичгийн дарга Б.Болдбаатар болон албаны бусад хүмүүс байлцав.

  Мөн УИХ-ын дарга З.Энхболд Үндсэн хуулийн өдөрт зориулан Төрийн ордонд зохион байгуулсан Сонирхогчдын шатрын улсын аварга шалгаруулах тэмцээний хаалтад оролцсоны дараа Бөхийн өргөөнд очиж үндэсний бөхийн барилдааныг үзэж сонирхсон юм. 

Барилдаанд улсын арслан Ө.Ганхуяг, улсын гарьд Д.Рагчаа, Б.Гончигдамба, Ж.Бат-Эрдэнэ, улсын заан Ч.Санжаадамба, Б.Батмөнх нарын хүчит 224 бөх зодоглолоо.

  Тус барилдааныг 1992 оноос хойш зохион байгуулж ирсэн юм. Энэхүү барилдаанд дархан аварга Б.Бат-Эрдэнэ хамгийн олон буюу дөрөв түрүүлсэн бол И.Доржсамбуу гарьд гурван удаа түрүүлж байжээ.